– Ingar Eira lea olu jagiid bidjan návccaid musealaš ovdánahttima bargguide. Erenomážit namuhat Jáhkovuona mearrasámi musea vuođđudeamis.
Nie cealká museavuođđudus, RiddoDuottarMuseat, preassadieđáhusastis, mas bálkkašumi mearrádus čilgejuvvo.
– Eira lea leamašan guovddážis ásaheamis Jáhkovuona Sámiid Searvvi 1983:s, mii čohkkegođii dieđuid ja dávviriid musea ásaheami ulbmiliin. 1991 lei vuot guovddážis álggaheamen Jáhkovuona museasearvvi, ja vuođđudit Jáhkovuona mearrasámi musea. Lea maid eará museain atnán fuola, cealká vuođđudus maiddái.
– Stuorra gudni
– Dát lei stuorra gudni munnje. Viehka vuollegašvuođain válddán vuosttá bálkkašumi. In lean vuordán ahte diet bálkkašupmi geigejuvvo munnje. Muhto giitevaš lean, dadjá Ingar Eira NRK:i.
Bálkkašumiin oažžu Eira 7.500 kruvdnosaš mátkestipeandda, ja diploma.
– In leat vel mearridan masa geavahan ruđa. Muhto guhká leamaš miella Arkangelskas Ruoššas fitnat. Dieppe leat ollu dološ árbemuittut. Miellagiddevaš livččii dieppe fitnat, lasiha son.
Ii vuosttaš bálkkašupmi maid oažžu
Ingar Eira lea badjel 30 jagi áimmahuššan sámi árbevieruid, ja bargandihtii seailluhit sámegiela.
Jáhkovuotnalaččii geigejuvvo bálkkašupmi skábmamánus. Ledje oktiibuot čieža evttohasa bálkkašupmái.
Maiddái Fálesnuori suohkan geigii guovtte jagi áige kulturbálkkašumi Ingar Eirai iežas giellaáŋgiruššama ovddas.
