Alberta guovllus Kanadas lohket olbmot iežaset gillát iešguđet lágan dávddaiguin, go dohko lea ceagganan stuorra bihkkasáddo- oljobohkkan industriija. Norgga njunuš politihkkárat galggašedje sihtat Statoila heaittit doaimma guovllus, oaivvilda Beaska Niillas, gii lea Norgga Sámiid Riikkasearvvi ja SámiÁlbmot bellodaga Sámediggeáirras.
Su mielas lea váivi leat Norgga stáhtaborgár go oaidná mii Kanada bihkkasáddoindustriijas dáhpáhuvvá.
- Mii leat buohkat oassi dalle Norgga stáhtas. Buohkat leat oassálaččat daid vearedaguide mat doppe dáhkkojit. Mu mielas gal lea váivi leat Norgga stáhtaborgár go oainnán, ahte olbmot jápmet doppe. Norga láve olgoriikkain čábbát hállat moht vuhtii váldá eamiálbmogiid ja álgoálbmogiid miehtá máilmmi ja maiddái vuoigatvuođaid berošteaddji. Ii oru Norggas šat dakkár dásis dal ahte sáhttá nu rábmot.
“Bahádahkki Kanadas”
Dené-álbmoga njunuš Francois Paulette logai NRK Sápmái ahte Statoil leat "bad-guys" dahjege bahádahkkit go bohket olju bihkasáddos Kanadas.
Dené-álbmot gullá Fort Smith- reserváhtii, mii lea Northwest Territorys, Kanadas. Statoila diehtojuohkindirektevra Jannik Lindbæk jr. muitala ahte Statoilas lea buorre oktavuohta eamiálbmogiin, mii orru Statoila rusttegiid lahkosiin, ja ahte sii áigut ain ságastallat guovlluolbmuiguin. Son lasiha maid ahte Statoila rusttegat leat guhkkin eret Fort Smithas, olles 600 km.
Lindbærk jr. lohká maid ahte Kanada bihkkasáddoindustriijas buvttaduvvo beaivválaččat birrasii 1,9 miljovnna fáhta olju, mas Statoil buvttada vuollel ovtta proseantta.
Liikká lea dat vearrái oaivvilda Beaska Niillas.
- Vearrái dieđusge lea. Jus 100 olbmo japmet, okta proseanta dain lea okta olmmoš. Dat lea juo okta heagga. Dat lea duođalaš go olbmot japmet dien industriija dihte. Jus diená jurddaša, de livččii juohke proseanttas ávki juobe dan ovtta proseanttas ge ja attašii maiddái earáide signála ahte Norga váldá ovdasvástádusa, maid berre maid válddit.