NRK Meny
Normal

– Standing Rock-áššis lea stuora symbolárvu

Sámeráđi presideanta lea duhtavaš go Obama-ráđđehus lea dál gaskaboddosaččat bissehan oljobohci huksemiid Davvi-Dakotas Amerihkás. – Dat mii dán áššis lea erenoamáš, lea ahte das lea šaddan oalle stuora symbolárvu.

USA-PIPELINE/NATIVEAMERICANS

Mannan vahkoloahpa leat vuostálasttit ávvudan go Amerihká ráđđehus čuovvola vuostálastiid gáibádusaid ja leat gaskaboddosaččat bissehan oljobohcciid huksemiid álgoálbmogiid guovlluin.

Foto: ANDREW CULLEN / Reuters

Mannan vahkoloahpa leat vuostálasttit ávvudan go Amerihká ráđđehus čuovvola vuostálastiid gáibádusaid ja leat gaskaboddosaččat bissehan oljobohcciid huksemiid álgoálbmogiid guovlluin.

Samerådets president Aile Javo

Sámeráđi presideantta Áile Javo

Foto: Liv Inger Somby / NRK

– Stuora symbolárvu

– Lea hui duođalaš ášši sidjiide geaidda dát guoská, geaid juhkančáhci lea áitojuvvon nuoskkiduvvot. Sullasaš ja vel groavvát áššiid oaidnit measta beaivválaččat máŋgga sajis máilmmis, muhto dat mii dás lea erernoamáš lea ahte das lea šaddan oalle stuora symbolárvu. Dat lea čohkken hirbmat olu vuostálastiid ja lea dan dáfus maid erenoamáš ášši. Lea buorre go Obama-ráđđehus lea dál gaskaboddosaččat bissehan doaimmaid. Dat ii dáhpáhuva nu dávjá, ja várra eat leat mii álgoálbmogat nu hárjánange dasa ahte oažžut doarjaga dán láhkai, lohká Sámeráđi presideantta Áile Javo.

Lea moadde vahku áigge go medias gullogođii dán dáhpáhusa birra ja dan maŋŋá leat ollugat searvan Standing Rock Sioux-álbmogii doarjjan, vuosttálastit huksenbargguid dán álbmoga eatnamiin.

Dál lea USA presideantta Barack Obama hálddahus gaskaboddosaččat bissehan doaimmaid, muhto vuostálastit gáibidit ahte prošeakta ollislaččat bissehuvvo. Obama-ráđđehusa mearrádus bođii dakka maŋŋá go federála duopmár Washingtonis lei hilgon Standing Rock Sioux-álbmoga gáibádusa bissehit olles dán oljobohci doaimma.

Vuordá fitnodaga gávdnat eará čovdosiid

Áile Javo rámida USA presideantta Obama go ná lea dahkan:

– Mus lea buorre doaivva dál go Obama-ráđđehus maid lea maid seahkánan áššái. Mu doaivva lea ahte dán ii dárbbaš politihkalaččat, iige dikki bokte čoavdit, muhto ahte dát fitnodat ieš oaidná ahte dát ii leat vuogas ja ahte gávdnet eará čovdosiid, vai eai dárbbaš billistit álgoálbmogiid báikkiid.

Obama-hálddahus oaidná dán dili duođalažžan ja oidnet dál dárbbu iskagoahtit álgoálbmogiid oainnu dákkár viiddis infrastruktuvraáššiin ja gulahallat singuin.

3,7 milliardda dollara máksá oljobohci huksen, mii njealji stáhta bokte USA:s manná. Vuostálastimii leat maid miehtá Amerihká searvan álgoálbmogat ja vaikko lávvardaga leat illudan dan go gaskaboddosaččat lea bissehuvvon dát bargu, de ain vuostálastet dassážiigo olles prošeakta bissehuvvo.

Sádden doarjjareivve

Guokte vahku áigi logai Amerihká sápmelaččaid ovddasteaddji Ellen Marie Jensen, ahte sámi sogalaččat leat dáhtton su ovddidit sávaldaga sámi servodagas dahje sámepolitihkkáriin, vai oččoše doarjaga dán vuostálastimii.

Dalle logai Sámeráđi presideantta Áile Javo ahte leat iskagoahtán dán ášši. Dál lohká Javo ná:

– Sámeráđđi lea sádden doarjjareivve dohko ovttas eará sámi organisašuvnnaiguin. Mii leat čuvvon ášši dárkilit media bokte ja maid epoasttaid bokte gulahallan. Jáhkán sii leat bures lihkostuvvan čalmmustahttit iežaset ášši. Mii árvvoštallat dađistaga lea go eará maid mii sáhttit dahkat doarjut sin.