Heahtá skuvlla oahppit leat gergosat gilvvohallat. Sii leat čuvvon Ođđasiid ja guldalan rádio. Suoma beale oahppit orrot leamen sihkkarat das, ahte vuitet dán jagi Dieđátgo-gilvvuid. Dát boahtá ovdan oahppiid čállin divttas Min jagi áiggit.
– Geasset mii vuojadit, čakčat mii guolástit, dálvet mii čuoiggadit ja dálvet mii vuoitit Dieđátgo-gilvvohallama, 15-jahkásaš 9. luohká oahppi Iina Marja Juuso muitala.
GULDAL:
Hárjehallan sakka
Maiddái Sirpmá skuvlla oahppit leat ráhkkanan gilvvuide. Sii eai loga iežaset astan ráhkadit divtta dahjege lávlaga dán jagi Dieđátgo-gilvvuide, go leat hárjehallan nu garrasit.
– Sii leat lohkan, geahččan Ođđasiid, guldalan rádio ja leamaš skuvllas juohke beaivvi, 15-jahkásaš 9. luohká oahppi Sara Márjá Utsi muitala.
Lohpidit juoiggastit
Kárájoga nuoraidskuvlla oahppitges eai loga iežaset nu bures ráhkkanan gilvvuide. Sii muitalit iežaset vehá lohkan ja vehá čuvvon Ođđasiid. Dasa lassin sii leat vehá skuvllas ráhkkanan gilvvuide. Kárášjoga nuoraidskuvlla oahppit eai loga iežaset ráhkadan divtta dahje lávlaga álgovurrui, muhto sii lohpidit juoigat dahje lávlut, jos besset gaskavurrui.
Dieđátgo 2010-gilvvuid 4. álgovuorru sáddejuvvo NRK Sámi Radios 11.2.2010 d. 16.30. Dán álgovuorus besset guokte buoremus skuvlla viidásut gaskavurrui.