NRK Meny
Normal

– Givssideaddjit leat ieža sápmelaččat

Sápmelaččat cielahit sápmelaččaid čiehkan dihte iežaset duogáža.

Profeassor Asle Høgmo

Asle Høgmo.

Foto: Nils Henrik Måsø / NRK

– Givssideapmi ja cielaheapmi vuolgá dan jurddašanvuogis mii dávjá sáhttá leat dáruiduvvan mearrasápmelaččaid gaskkas, lohká Romssa universitehta professor Asle Høgmo, gii lea dutkan earret eará mo sápmelaččat cielahuvvojit.

Čihket iežaset sámevuođa

Høgmo muitala ahte dáruiduvvan mearrasápmelaččat dábálaččat jurddašit ahte go sii cielahit sápmelaččaid, de ii oktage dáidde árvidit ahte sii maid leat sápmelaččat. Leat sápmelaš lea ollugiid mielas heahpat.

– Sii eai hálit ahte oktage jearrá sin identitehta birra ja de baicca bidjet fuomášumi earáide dan bokte ahte cillet sin sápmelažžan, dadjá son.

Vearrámus Oarje-Finnmárkku rittus

Høgmo ii loga sápmelaččaid cielahit dušše Álttás, muhto cielaheapmi lea vearrámus Oarje-Finnmárkku rittus, ja erenoamážit gávpogiin. Gávpogiin oainnat galget nu ođđaáigásaččat ja dat mii lea ođđaáigásaš lea leahket norgalaš.

– Jus dákkár cielaheamis galgá eret beassat, de ferte hupmat dán birra almmolaččat vai olbmot šaddet dihtomielalažžan dán ektui. Dát jurddašanvuohki lea oainnat dego kultuvrralaš oahppu servodagas ja man birra eai soaitte leat nu dihtomielalaččat, lohká Høgmo.

LOGA EAMBBO: Suorganan go givssidit sámi mánáid Álttás