Su mielas lea hástaleaddji hállat noaide- ja vuoiŋŋalašvuođa birra, muhto válddii hástalusa go bovdejuvvui «Gozuid Alde» podkástii guossin.
Sámis leat máŋga njuolggadusa vuoiŋŋalašvuođa hárrái, oaivvilda Somby.
Ovdamearkka dihte ii galgga jitnosit muitalit iežas vuoiŋŋalaš attáldagaid birra.
– Dalánaga go muitališgoađát iežat fámuid birra, de maiddái massát daid, čilge Somby, guhte lea bargan sihke journalistan, historihkarin ja dál Sámedikki seniorráđđeaddin.
Sámi «mindgame»
– Nu ahte ii leat ávki dus jearrat makkár attáldagat dus leat, geažuheaba prográmmajođiheaddji guovttos Ella Marie Hætta Isaksen ja Sajje Solbakk.
– Mus lea dakkaviđe dárbu dadjat ahte in leat noaidi, bohkosa Katri Somby.
– Sáhtán nu dadjat ahte in dieđe buot, muhto dieđán veaháš das mii boahtteáiggis galgá geavvat, joatká son.
Podkástta mihttun leage hástalit sámi servodaga digaštallat fáttáid mat leat tabufáttáid.
Buot golbma nissona rešket ságastaladettiin, ja leat ovtta oaivilis das ahte sápmelaččat eai leat njuolggočoalagat.
– Son guhte lea albma noaidi, ii mieđit iežas noaidin, čilge Somby.
– Albma sámi mindgame, vástideaba nuorra nissona guovttos oktii njálmmiid.
Katri Somby jáhkká buohkain Sámis leat vuoiŋŋalašattáldagaid.
Son dovdá oallugiid geat ain ellet dološ sámi oskkus, sihke aktiiva noaidin ja olbmot geat ain oaffaruššet siiddiide.
Vuoiŋŋat bukte dieđu
Maŋŋel erenoamáš vásáhusa «Stjernekamp» gilvvus lea Ella Marie eanet ahte eanet jáhkkigoahtán vuoiŋŋaide.
Dušše moadde beaivvi ovdal TV-sáddaga oaččui Ella Marie dieđu dakkáris maid ii máhte nu bures čilget.
– Lei dego ahte muhtun vuoibmi fáhkka devddii mu ratti.
– Ja dovden ahte in sáhte juoigat maidege eará go Máze gili. Mus ii lean alddán šat dadjamuš das.
Lávdde alde easka duođas ealáskedje vuoiŋŋalaš fámut.
– Duođai dovden ahte guđđen iežan rupmaša dan botta go juigen Máze.
– Ja buot mu máttut čužžo ráidun maŋábealde ja dolle mu olggiin.
Dan maŋŋel lea Ella Marie imaštallan mii son geavašii jus son livčče eanet rabas vuoiŋŋalašvuhtii.
Guldal fas go Ella Marie juoiggai Máze Stjernekampas.
Niegut šaddet duohtan
Katri Somby lohká iežas nihkkošin, dakkár gii niegus muhtomin oaidná mii boahtteáiggis dáhpáhuvvá.
– Sáhtán nu dadjat, ahte in dieđe buot, muhto veaháš das mii boahtteáiggis geavvá, čilge Somby.
Leago dat mannan ija niehku dakkár mii galgá dáhpáhuvvat vuoi ii, dan ii son dieđe ovdal lea juo dáhpáhuvvan.
Okte son niegadii iežas ahkásaš olbmo hávdádeami ja heađástuvai dainna ahte leago son mihkke maid son sáhtášii dahkat dainna.
– Muhto dat han lea nu ahte in mun niegadivčče dan jus ii galggaše dáhpáhuvvat. Ii das leat mihkkege maid mun sáhtán bargat.
«Spice up your life»
Katri Somby oaivvilda vuoiŋŋalašvuohta addá oadjebasvuođa, jeđđehusa ja ilu olbmuide, ja danne lea riggodahkan sámi servodahkii.
– Albma dakkár «Spice up your life», reaškkiha Somby.
Somby mielas dattetge lea váidalahtti go sámi osku maid ii leat seamma láhkai dohkkehuvvon go eará oskkut.
– Ii oktage jeara omd budhisttain ahte «mas don dieđát ahte don leat budhista».
Su mielas eai galggaše earát gažadit dange jus soames muitala ahte son lea vuoiŋŋalaš.
