– Mii leat gádjon eanet olbmuid heavvaneamis dán geasi go diibmá, ja dat dáidá das vuolgit ahte eambbosat leat álgán geavahit gádjunliivva, dadjá Redningsselskapet gulahallanhoavda, Frode Pedersen.
Son muitala ahte sii diibmá gádjo 50 proseanta eambbo olbmo heahtedilálašvuođas ovddit jagi ektui, dalle gádjo 45 olbmo heavvaneamis. Pedersen gal dadjá ahte gádjunliiva dat lea mii doalaha statistihkkalogu vuollin.
Redningsselskapet gulahallanhoavda, Frode Pedersen oaidná čielgasit ahte gádjunliiva easttada heavvanemiid.
Foto: privatGeatnegahtton geavahit gádjunliivva
Čávžu safári turisttafanasvuoddji ja mázelaš, Johan Persen Eira muitala iežaset geatnegahtton geavahit gádjunliivva, go fal gáttis luitet ja čáhceborgan dollejit eatnoráigge.
Eira lea geassebottaid fievrridan turisttaid johkafatnasiin eanus, ja vásiha ahte sámis leat dál viššaleappot nahkehit badjelii gádjunliivva go ovdal.
Fanasvuoddji muitala iežas vásihan dáhpáhusaid mat leat čájehan man dehálaš gádjunliiva lea. Son maid vásiha ahte earenoamážit nuorat leat dán áigge viššaleappot geavahit gádjunliivva.
DÁHPIN: – Mis gal lea šaddan jo dáhpin, eat vuolgge joga ala almmá liivva haga, muitala Eira.
Foto: Privat– Ovdalašáigge lei áibbas eará dilli, dalle ii lean dábálaš ahte olbmos lei gádjunliiva. Dat lea beare hárjáneami duohken, go hárjehat iežat coggalit gádjunliivva, de dan haga it šat vuolgge gosage fatnasiin, dadjá Johan Persen Eira.
Dábálaččat ii loga Eira dáhpáhuvvat maidige váralaččaid go lea fanasmátkkis, muhto jus lihkohisvuohta deaivida ja geavvá čáhccái, de lea olu buoret vejolašvuohta beassat čázis heakkas, eandalii jus manat galmmas.
– Gádjunliivvain govddut ja dainna sáhtát beastit heakkas, loahpaha Johan Persen Eira.
