Da la Vuonarijka museasiebrre mij dáv oajvvat, ja dat la nasjonalalasj guddnebálkká mij de juohkka jage juogeduvvá museaj mij la sierralágásj ja buorre museabargov dahkam.
Árrana musea bæjválasj jådediddje Harrieth Aira la ávon gå li oajvvadum.
– Dát de mijdjij dåbddu stuorra guddnen. Ja dát merkaj Vuonarijka dásen lij vuojnnám mijá musea bargojt ánssiduvvam guddnebálkkáj oajvvadum. Dat sihtá javllat rijkadásen lij vuojnnám dav bargov majt mij jagij tjadá lip dahkam.
Åtsådallamijt åvddånbuktám
Sivvan gå Árrana musea l oajvvadum la gå musea l tjalmostam ássjijt dagu dal oahpestiddjij dilev, ja aj gássjelis temájt tjalmostam ja bigodam.
– Musea l stuorra bargov dahkam sáme åtsådallamijt åvddånbuvtátjit, dagu dal báhtariddjij oahpestiddjij birra. Muhtem prosjækta la åtsådallamijt åvddånbuktám queer ja homofijla sámijs, ietjá vas bávtjas vierredahkkohiståvråjs ma li bihkusam julevsáme sebrudagán.
– Árran la bálggáv vuosedam mihásvuohtaj ja árvvogisvuohtaj ij la avajálduhttet jalik tjiegadit, valla dav mij la gássjelis ja mij skámov buktá galggá diedoj, rabásvuodajn ja gierddisvuodajn duosstoduvvat.
Dav tjállá jury gå sivádahtti manen Árrana musea l oajvvadum.
Harrieth Aira (gb) la riek ávon gå Árrana musea l oajvvadum. Gåvvå l ietjá dahpádusás musean.
Foto: Sander Andersen / NRKGássjelis tema
Museajådediddje Harrieth Aira javllá viek ednagav lij gássjelis ássjijt tjalmostam, ja sebrudakrollav bajedam.
– Jáhkáv dat vuoset mij ep la dahkkár árbbedábálasj musea mij dåssju kultuvrahiståvråv gåtset.
Ja Aira nammat ållo barggo l ájn åvddålij guovlluj majt Árrana musean viertti dahkat.
– Jus lidjin ienep ulmutja ja ienep biedniga, de li miján dievva bargojs mij la dagu gárggá majt lulujma tjadádit ja álgadit dagu dárojduhttem vájkkudsájt guoradallat, ja aj gæhttjat vehi ådåájggásasj histåvråv majna ep la háhppidam.
– Ja de vuorddep dávverijt ma li Oslon, giehtos Bååstede prosjækta, majt mij sihtap diehki åttjudit.
