– Ålos li sjávot årrum ietjas sámevuoda birra. Muddo l dal giehttogoahtet.

– Muddo l dal ietjas sámevuoda ja sáme duogátja birra giehttogoahtet dajnas gå li ålos gudi li sjávot årrum nav mælggadav.

Dav javllá Lufåhta årro Ellen-Marie Winther, guhti åvdep vahko semináran oassálastij gånnå åvddån bådij Lufåhtan la ienep sámevuohta ja ienep sáme gå dav mij åvddåla la dåbdos.

Ellen Marie Winther dal sihtá dilev giehpedit sábmen liehket, gielav oahppat ja árbbedábijda ruoptus gávnnat. Duodden aj dilev láhtjet nav vaj suv mánná aj máhttá subtsastit sån la sábmelasj.

– Mujna l niehko sábmen máhttet liehket givsedime dagá. Ja de niegadav galggá álggep sjaddat gielav oahppat vaj ruoptus dábijda gávnav, nav vaj ietjam mánná máhttá javllat sån la sábme.

• Lågå aj: Oahpestiddje: – Muv fuolkke l dárojduhttemav garrasit vásedam

– Gávkasvuodav dåbdåv

Ellen Marieij la ájnas ietjas duogátjij gávnadit, ja sån javllá gåsstå boahtep ienep merkaj gå majt iesj duosstap javllat.

– Sidáv ietjam mánnáj subtsastit gåsstå boahtep, gåktu luondov ávkástallat, gåsstå biebbmo ajtu boahtá danen gå lip identitehtav massám.

– Ja de l dille sjaddam nav gå ájtsav mujna li ienep máhttaráhko ja máhtarádjá gudi lidjin sáme, de mujna vádjo dåbddu, ja dav vájov jali surgov sidáv ierit válldet, diedoj lådnot.

Gå lij dán jage ávvudallam, 100 jage dallutjis gå sáme vuostasj bále Roandemin tjåhkanin sámeássjijt åvdedittjat, de Ellen Marie gávkasvuodav dåbdåj gå suv familjan divna sámevuohta l ierit sihkodum.

– Valla dáv gávkasvuodav vierttip de gádodit, ja tjavgga vat dáj ássjij birra ságastit, javllá Ellen Marie.

• Lågå aj: Nærmere hundre år siden barna lærte samisk. Nå har det snudd.

– Sáme ålles Lufåhtan

Ienep sáme lij dal Lufåhtan gå dav majt jáhkkep, ja merkajs lij de ålov, jus dal galggap jáhkket dav majt åvdep professåvrrå Nuortta universitehtan, Alf Ragnar Nilsen, giehttu.

Nilsen javllá moadda merka lij Lufåhtan, ja ij ga dåhkki tjálálasj gáldojn gæhttjat gåktu lij.

– Dánna viertti moattelágásj gáldojt råggåt dagu arkeologalasj gáldojt, bájkenamájt ja njálmálasj gáldojt. Ja gå de dajt aktijda, de la vejulasj gávnnat gåktu Lufåhta sáme histåvrrå l læhkám.

• Lågå aj: Den harde kampen om samiske skilt

Nilsen la dåbdos historihkkár, tjálle, lågådalle ja nav, ja la professåvrrå emeritus, majt gåhtjoduvvá, åvdep professåvrrå.

Norrøna histåvrrå l dal oahpes Lufåhtan, ja la danna riek ålov tjalmostahtedum, madi sáme histåvrrå l gáhtum, tjielggi professåvrrå.

– Dájt maŋemus jagijt la åvddånboahtám sáme lij ålles Lufåhtan årrum. Da stuora høvdiga, gudi de sámij oasestin dáv nammadin. Sæmmi aj Ottar, guhti aj dán birra giehttu.

Alf Ragnar Nilsen javllá sáme vilá Lufåhtan lij, valla dárojduhttem lij Lufåhtan aj, ja duodden dal aj muhtema e diede siján la sámevarra.

• Lågå aj: Når er man samisk nok?