Son lea dovddus áborigiinnálaš bálkkašumi vuoiti ja su mielas ii leat doarvái ahte Australia eiseválddit dál áiggošedje buoridit aborigiinnaid dili nu ahte sin gaskamearálaš ealllinahki šattašii seamma guhkin go dat mii Australia vilgesolbmuin lea.
Vuoigatvuođat guovddážis
Aborigiinnaid njunuš Pat Dodson oaččui gieskat Australia áidna ráfibálkkašumi mii lea nu gohčoduvvon Sydney ráfibálkkašupmi. Sutnje geigejuvvui bálkkašupmi dan ovddas go lea rahčan Australia álgoálbmogiid olmmošlaš vuoigatvuođaid ovddas, ja bálkkašupmi addo muđui olbmuide geat erenoamáš vuogi mielde ovddidit ráfi ja rehálašvuođa.
Árvosaš bálkkašupmi
Bálkkašumi leat ožžon ovdal Dodsona, earret eará maiddái dovddus ruoŧŧilaš diplomáhta ja vearjjohisvuođa ovddideaddji, Hans Blix, bisbma Desmond Tutu ja indiana girječálli ja olmmošvuoigatvuođaid ovddasteaddji, Arundhati Roy.
Aborigiinnaid ovddasteaddji Dodson geavahii bálkkašumi dustema oktavuođa, mii dollui Sydney Opera viesus, rámidit Australia eiseválddiid go dál áigot buoridišgoahtit aborigiinnaid dili nu ahte sii maid sáhtašedje ealligoahtit seamma guhkká go muđui earát Australias.
Ohcala buhtadusa
Muhto son ii duhtan dasa, go logai dán barggu maid eiseválddit dál álggahit, ii sáhte gohčodit buhtadussan sidjiide geat leat gillán dainna go fievrreduvvojedje eret ruovttuineaset, dalle go Australia áiggui beassat eret iežas álgoálbmogis ja jávkadit dan oalát.
Nu son gáibida ge dál ahte Australia eiseválddit máksigoađášedje gillámušbuhtadusaid dáidda áborigiinnaide, dieđiha Australia ABC
