50-tånna trailera vássi – madi máná væddjabællán tjuodtju

– Vuorddep dåssju desik vuorbedisát manná, ja ulmusj dåssju sávvá ij la akta lagámusájs. Ja sårme sjaddi jus juojddá ij dálla dagáduvvá. Luodjomláhkáj la nav.

Æjgát Søve Jakobsen Ájluovtas Divtasvuonan ij máhte ietján dahkat gå vájnnodit oajválattjat juojddáv dahkat rijkarahtijn 827 mij manná jur smávmánnáfámilja goade vásuk.

Juohkka ideda tjuodtju smávva máná væddjabællán skåvllåbussav vuorddemin, madi trailera ruosjedi vásuk 80 kilomehtara tijman.

Tsåhke tjåddågin

Álmmuk la juo måttijt jagijt barggap åttjudittjat vádtsem- ja syhkalbálggáv ja tjuovgav rahte milta.

– Ulmusj vádtsá tsågijn tjåddågin. Ep máhte vedjajt vádtset dajn ájgijn gå færjjo manná. Nav ållo trafihkajn ja låssåtrafihkajn de la várálasj. Jus galggap væddjaj de agev vierttip ájgev gáhttit åvddål mannap. Rahte ij la hiebadahtedum divna trailerijda, javllá Jakobsen.

Duorastak iehkeda ásaduváj loavggágárggá tjalmostahtátjit dav várálasj rahtev. Birrusin 60 vádtsin dav 6 km guhka vedjav mij E6 la tjanádum, madi færjjotrafihkka moadda lågev-tånna trailerij vásij.

Åtsåt dåjmajt

Ásadibme álgadiddje Johanne Ellingsen hålaj ja dálla åtsåt dåjmajt oajválattjajs.

– Muv mielas oajválattja e nuohkásav dagá. Lip guhkev vuorddám vaj galggá åttjuduvvat, ruvva de viertti liehket mijá vuorro. Li læhkám sårme dán vedjan ja læhkám moadda vahágahttema, valla ij mige dáhpáduvá. Dát la várálasj væddja.

– De dal fylkkadigge viertti oassálassstet, javllá Ellingsen.

(artihkal joarkká gåvå vuollelin)

Ienep trafihkka

Rijkarahte 827 ferjujn Ájluokta-Gásluokta la ienemusát anedum rukto låssåsuvdatjibmáj Fuosko ja Narvijka gaskan. Sæmmi båttå gå bargaduvvá lasedit frekvensav færjon, de álmmuk báhtsá fámodisát gæhttjat.

– Suddo l gå lasedi færjjojåhtulagáv åvddål gå li åttjudam vádtsem- ja syhkalvedjav dåhku, javllá Jakobsen.

– Fárttarádjá viertti vuoleduvvat. 80 kilomehtara tijman la ilá ruvva. Baláv sårmme sjaddá. Suorgganahtte la gå trafihkka galggá laseduvvat, javllá Ellingsen.

Viertti sállaj tjiellit

Rijkarahte 827 la væddja mij doalvvu oassásij ja skåvllåj. Duodden la guhkedibme vádtsembálggás mij álu vádtseduvvá nuorajs ja ållessjattugijs.

– Jus iejvvi guokta trailera gå la vedjan de la dåssju sállaj tjiellit. E ga juohkkahasj fártav vuoleda ga. Moattes e duosta dav vedjav vádtset. Duodden la ållu sjævnnjat. Sierraláhkáj tjavtjajt iv lijkku dav vedjav vuodjet, tjielggi Jakobsen.

Sån ij riekta lijkku gå fámiljajn vedja milta vádtsi.

– Máná e oattjo væddjaj mannat, ja gå lip váttsátjit de agev mánáj siegen vádtsep. Ælla miján vuojga máhttelisvuoda syhkaldittjat. Ij la sadje ienebuj gå bijllaj ja syhkkalij vedja nanna. Lav riek dudálasj ásadimijn, dát la riek buorre doajmma.

Galggá ássjev guoradallat Stuorradikken

Nordlánda stuorradikkeájras, Kjell-Idar Juvik (Ap), javllá NRKaj sån mánnodagá galggá guoradallat jus juojddá dagáduvvá dan várálasj vedjajn.

– Siján la gal várálasj væddja, sierraláhkáj gå usjudallap låssåtrafihkka galggá laseduvvat mijá fylkan, javllá Juvik guhti tjåhkkåj suvddem- ja guládallamnammadusán.

Sån loabet dættov biedjat vaj ássje tjoavdeduvvá.

– Dát la væddja mij viertti vuoroduvvat, valla ij la aktak mujna njuolgga guládallam dan vedja birra åvddåla, danen vierttiv vuostatjin guoradallat jus juojddá l dagádum.

Stuorradikkeájras javllá NRKaj sån sihtá loavggágárggá álgadiddje sujna njuolgga guládalli.