Áiggošedje almmuhit mánáidgirjjiid bihtánsámegillii
Bihtánsámi (bidumsámi) giellaguovddáš, Duoddara Ráfe, lea Sámedikkis ohcan ruhtadoarjaga vai besset ráhkadišgoahtit mánáidgirjjiid bihtánsámegillii.
Guovddáža beaivválaš jođiheaddji, Stig Morten Kristensen, lohká leat dehálaš vuoruhit dákkár barggu.
– Dál illá gávdnojit mánáidgirjjit bihtánsámegillii. Mii háliidivččiimet dahkat juoga vai mánáide livčče eanet válljenmonni ja vai besset lohkat ieš guđet lágan girjjiid bihtánsámegillii, lohká son.
Bihtánsámegiella lea sakka áitojuvvon giella ja hui moattis hállet dán giela Norggas ja Ruoŧas. Les på norsk.