SGa alternatiiva bušeahtta: 90 miljovnna eanet sámi ulbmiliidda
Duorastat iđida bijai Sosialisttalaš gurutbellodat (SG) alternatiiva stádabušeahta ovdán. Das sii evttohit 90 miljovnna ruvnnu eambbo sámi ulbmiliidda, čállá bellodat preassadieđáhusas.
Bušeahtas evttohit lasihit 17 miljovnna Saminorii, 50 miljovnna Sámediggái, 9 miljovnna Sámi allaskuvlii, 6 miljovnna preassadoarjaga sámi áviissaide ja 8 miljovnna Sámi filbmainstituhttii (ISFI)
– Oktiibuot mii lasihit sámi ulbmiliidda 90 miljovnna ruvnnu. Dát lea vuot dat bušeahtta mii čájeha ahte SG háliida vuoruhit ja čuovvulit sámi áššiid. Ii leat gal hirpmástuhtti ahte SG dás vuoruha sámi áššiid, muhto mu mielas lea hui dehálaš ahte mii čájehit ahte mii vuoruhit. Mun jáhkán ahte mii oažžut stuorra hástalusaid sámi servodagas ovddasguvlui, ja dalle lea duođai mearrideaddji ahte min sámi ásahusat ja sámi servodateallin leat bures ráhkkanan, dadjá várreáirras Hilde M. Gaebpien Danielsen preassadieđáhusas.