Eai bisset doaimmaid Fovses
– Dan mun sáhtán dušše lohkat ahte dasa mii eat mieđit, go dás lea sáhka stuorra el-fámpmoguovllus.
Dan vástida stáhtaministtar Jonas Gahr Støre miellačájeheadji Elle Nystada cealkámuššii ahte buoremus livččii bissehit doaimmaid Fovses.
Lea fargga 600 beaivvi vássán das rájes go Alimusriekti celkkii duomu, ja Fovsen-áššis ii leat vel čoavddus.
– Lean čađat dadjan, ahte muhtun aksuisttaid vástádus dasa maid oaidnit lea "Jávkadehket buot turbiinnaid", ja vástádus dasa lea "Dan eat daga". Dat ii leat nu movt mun lohken dan duomu, nu ii leat Alimusriekti cealkán. Muhto mii fertet dahkat rievdadusaid, váikkuhit dasa ahte mii čuovvut dan maid Alimusriekti lea dadjan, das ii leat mihkkege maid digaštallá ja mii bargat áššiin. Mun ádden ahte demonstránttat leat vuostá, muhto mun sáhtán sidjiide duođaštit ahte mii geavahit áiggi nu bures go vejolaš ohcat čovdosa.
Nu stáhtaministtar dajai ođđasiin odne.