Ohcet huksenfálaldagaid ovdalgo leat meannudan Equinora ohcamuša - ođđa Fovsen-ášši
Statnett lea ohcagoahtán huksenfálaldagaid fápmolinnjái Skáiddi ja Hámmerfeastta gaskka.
Dát geavvá vaikko vel ráđđehus ii leat meannudan Equinora ohcamuša elektrifiseret Muolkkuid gássarusttega (dárogillii: Melkøya).
– In leat hirpmahuvvan, lea dábálaš ahte sii nie dahket. Bidjet johtui dákkár bargguid ovdalgo lea formálalaččat mearriduvvon, dadjá boazosápmelaš Nils Mikkelsen Utsi.
Utsi lea 22 Fiettar orohaga jođiheaddji ja fápmolinnjá manašii orohaga čađa. Orohagas leat jo massán eatnamiid fápmolinnjái, mii manná Álttá ja Skáiddi gaskka.
Utsi oaidná ahte ii gánnet fápmolinnjá hukset jos Equinora gássarusttet ii elektrifiserejuvvo.
Dán vahkkoloahpa celkkii Guovddášbellodaga riikkačoahkkima eanetlohku ahte fápmolinnjá ii galgga huksejuvvot.
Finnmárkku Bargiidbellodat ges háliida ásahit eanet elfámu fylkii. Stáhtaministtar Jonas Gahr Støre geardduhii dalle go finai Finnmárkkus ahte eai mearrit maidege fápmolinnjá dáfus ovdal go leat gieđahallan Equinor ohcamuša .