Nato-miellahttuvuohta dehálaš Ruŧŧii
– Ii mihkkege leat dehálat sihkarvuođagažaldat Ruŧŧii go ahte mii Suomain fargga šaddat Nato-miellahtut, dajai Ruoŧa stáhtaministtar Ulf Kristersson preassadieđáhusas disdaga.
Durka moaitá garrasit dan go Ruoŧŧa mannan vahkkoloahpa divttii olgešradikála Rasmus Paludana boaldit korána turkalaš ambassáda luhtte Stockholmmas.
Dáhpáhusa maŋŋel celkojuvvui ahte Ruoŧŧa ii sáhte vuordit turkalaš doarjaga iežaset Nato-ohcamii.
– Ruoŧas lea ollislaš sátnefriddjavuohta doaimmas. Lea justa dán maid háliidat suodjalit Nato-miellahttuvuođain suodjalan dihte iežamet demokratiija, dajai stáhtaministtar Kristersson.
Stáhtaministtar ja eará ráđđehusmiellahtut deattuhedje máŋgii ahte sin ambišuvdna lea mannat Natoi Suomain.
Suopma lea ovdalaččas čielggadan ahte sii háliidit joatkit ohcamiin beroškeahttá čovdoš go Ruoŧa čuolbma vai ii.