Sámedikkis: Nuvttá sámegiel mánáidgárdefálaldat
- Mánát leat min boahtteáigi, danin vuoruhat nuvttá sámegiel mánáidgárdesajiid, nu logai NSR parlamentalalaš jođiheaddji Beaska Niillas go rabai bušeahtta ášši sámedikki dievasčoahkkimis. Otne de mearrida sámedikki dievasčoahkkin ahte sámegiel mánáidgárdesajit šaddet nuvttá. Dievasčoahkkin gieđahallá dan bušeahta 2023 oktavuođas. Otná loguid mielde ožžot lagabui 200 máná olggobeal Davvi-Tromssa ja Finnmárkku nuvttá sámegiel mánáidgárdesaji. Boahtte jagi šaddet buot Finnmárkku ja Davvi-Tromssa mánáidgárddit nuvtta, ráđđehusa dáhtu mielde.
Sámegiel mánáidgárdefálaldat lea 13 mánáidgárddis olggobeal Davvi-Tromssa ja Finnmárkku. Ja borgemánu 1. b. rájes šaddet dát mánáidgárdefálaldagat nuvttá. Justa man lahkai dat ortnet praktihkálaččat galgá doaibmat galgá sámediggi čielggadit ea.ea. mánáidgárdeeaiggádiguin ja gielddaiguin.