– Jus e máná oattjo smávva detálljabágojt ma dåbdåjda ja árggabæjvváj gulluji, de giella jábmá
Girjjetjálle Samuel Gælok Ájluovtas Habmera suohkanin, la giellajn álu barggam - tevstaj tjadá. Dálla l sån mánágirjev almodam gånnå la inspireriduvvam ietjas sijddabájkes Tjierrekluokta Oarjjevuonan Divtasvuonan. Ja dát la vuostasj subtsas majt sån la mánájda subtsastallam – vargga vihttalåk jage dás åvddåla. Gæloka mielas galggi ienep girje tjáleduvvat nuoregáttes.
Girje namma l Virok ja Bájska. Iđut la girjjealmmudahka ja Nina Marie Andersen la tjuorggam tjáppa, bájnos gåvåjt.
Girjetjálláj la ájnas mánájgirjijt tjállet, ja ávttji dal iehtjádijt tjálátjit.
– Jus e máná oattjo smávva detálljabágojt ma dåbdåjda ja ietjasa árggabæjvváj gulluji, de giella jábmá, javllá Gælok.