Logi orohaga deaivvadit Statnettain
Ikte álggii diggi mas logi orohaga gáibidit buhtadusa go leat massán guotteteatnamiid, Statnetta 420 kV-linjjá huksemii. Elfápmolinjá huksejuvvo Ofotenis, Nordlándda fylkkas, gitta Hámmárfestii Finnmárkui. Buhtadusa leat dát orohagat gáibidan: 42 Beahcegealli, 35 Fávrrosorda, 34 Ábborášša, 33 Spalca, 40 Orda, 26 Lákkonjarga, 32 Silvvetnjarga, 25 Stierdna ja Sállan. Diggi gieđahallojuvvo Davvi-Romssa diggegottis, ja áššái lea biddjon 15 beaivvi. Nu čállá Ávvir áviisa.