Dáktebátsudisá mujtton
Guokta mujttotáblo ilmoduvvi Vánasjsuollun Divtasvuonan bierjjedagá. Táblo li tsieggidum suollu histåvrå diehti almulasj girkkogárdden ja sáme hávdesadjen mij lij juo dålusj sáme åsko rájes. Divtasvuona suohkan ásat dáv ilmodimev. Jages 1886 gitta birrusij 1910 lij suoloj anon almulasj girkkogárdden. Tjerdajdutkama aktijvuodan 1900 jagijn váldeduvvin dáktebátsudisá Vánasjsuollus ja ietjá sajijs Divtasvuonan. Dáv dahkin váni gatjádak guoskavasj familjajs, ja vil uddnik li dá dáktebátsudisá Oslon oassen Schreinera tjoahkkijs.