Idet Sámedikke presidænnta Aili Keskitalo iejvvi Divtasvuona suohkanstivrav gånnå dán birra sjaddá ságastallam.
– Dat mij årru aj hásstalussan la suohkana bieles ælla náhkam jages jahkáj adnet rudájt ma li sámedikkes juoloduvvam daj dåjmajda. Dat la muv mielas ihkeva suddo gå gávnnuji rudá. Mån sávav sij e joarke dajna láhkáj barggat jut rudá báhtsi ma e boade ávkken sámegiellaj ja sámegielagijda Divtasvuonan, javllá Keskitalo.
Sámedikke presidænnta tjåhkan idet Divtasvuona suohkanstivran, ja danna sån galggá hållat.
– Rudá ruopptot sámediggáj
Aili Keskitalo gætjájdallá rudá lulu ruopptot sámediggáj mannat.
– Dat mij la dáhpáduvvam nav gåk mån dádjadav, de la suohkan biedjam guovtegielakvuoda rudájt sierra fåndaj. Dan ådå sjiehtadusá milta majt mij lip suohkanijn dahkam de ij la dat máhttelis. De la ham nav jus suohkan ij nagá adnet dav majt sámedikkes oadtju, de galggi da rudá ruopptot sámediggáj, ja ietjá dåjmajda da biejaduvvi. Ja dav vierttip mij dal dálla Divtasvuona suohkanijn ságastallat, javllá Aili Keskitalo.