Nye tiltak for å slå fast at Preikestolen er norsk

Tidlegare denne veka blei det kjent at norsk reiselivsbransje flyr inn ei rekkje utanlandske medium til Preikestolen når filmen «Mission Impossible 6» har premiere ved fjellplatået seint om kvelden onsdag 1. august.

Håpet er at det skal bli tydeleg for omverda av Preikestolen er norsk – og ikkje indisk.

Bakgrunnen er at filmstjerna Tom Cruise spelte inn sluttscener til actionfilmen i november i fjor. Men trass dette er handlinga i filmen plassert i Kashmir i India.

Visit Norway, Region Stavanger, Fjord Norge og fleire andre aktørar har invitert ti større internasjonale medium til ei fire dagars rundreise i Rogaland i samband med filmpremiera.

Ifølge Dagbladet bruker den statlege turistorganisasjonen Visit Norway 50.000 skattekroner på å fly dei utanlandske journalistane til Norge.

Reklamestunt

Men det stoppar ikkje med det. Ifølge Reisemål Ryfylke, som er ein del av samarbeidsprosjektet, blir det sett i verk fleire tiltak for å slå fast at Preikestolen er heilnorsk.

Det mest konkrete nå er ein to minuttars reklamefilm for norske fjordar, som blir visst for første gong i forkant av premiera på Mission Impossible-filmen på Preikestolen.

Reisemål Ryfylke vil ikkje oppgi prislappen på filmsnutten, men seier dei har hyra inn folk for å laga reklamen.

– Filmen blir eit lite glimt av kva me har å tilby i Norge, og er eit ledd i prosjektet me har med å få mest effekt ut av Mission Impossible-filmen og premiera på Preikestolen, seier dagleg leiar i Reisemål Ryfylke, Liv Jorunn Tjelmeland.

Saknar strategi

Sjølv om det ikkje blir vist klipp frå «Mission Impossible» i reklamestuntet, kan filmsnutten fort minna om actionfilm-serien, ifølge Tjelmeland. Stuntet er spesielt retta mot sosiale medium.

– Me skal visa at me tar Preikestolen tilbake til Norge. Det skal ikkje vera nokon tvil om kor Preikestolen ligg, seier Tjelmeland, som varslar fleire tiltak utover hausten.

Dagleg leiar i Markedsføringshuset i Stavanger, Trygve Forgaard, forstår godt reiselivsnæringa sine tiltak for å sikra seg mest mogleg effekt av Tom Cruise-besøket.

– Eg forstår at dei vil optimalisera effekten. Og lukkast dei, gjer dei jobben sin, seier han.

Marknadsføringseksperten er også rådsleiar i Stavanger turistforeining. Han er derfor også opptatt av å få på plass ein betre strategi på kor mange turistar som er ønskeleg til Preikestolen.

– Dette er ein politisk diskusjon som ikkje er tatt. Me må læra av dei som har tatt imot store turiststraumar før oss.

Tidlegare i sommar var Lysefjorden, kor Preikestolen ligg, blant sju nye turistmål som fekk den grøne merkelappen berekraftig reisemål.