No kan du ikkje lenger selje hytta «som ho er».
Det gjer at hytteeigarar må samle mykje meir dokumentasjon og ein grundigare tilstandsrapport må ligge til grunn før dei kan selje.
Lovendringa vart sett i verk frå 1. januar 2022, men allereie opplever hytteeigarar at kjøparar kvir seg for å kjøpe hytte når det er større dokumentbunkar som viser «feil og manglar».
– Skulle ønskt eg selde hytta tidlegare
Hytteeigar Ragnar Lie la ut hytta si i Hurdal for sal rett før jul. Då valte han å ta tilstandsrapport etter dei nye reglene. Det har gjort at fleire moglege kjøparar har trekt seg.
Tilstandsrapporten viste nemleg mange feil og manglar som aldri hadde vore noko problem for Lie.
Hytta til Lie er 50 år gamal. Tilstandsrapporten peikte mellom anna på ei skeivheit i golvet som truleg var der lenge før han kjøpte hytta. Lie har aldri merkt noko til det, men tilstandsrapporten peiker på dette som ein alvorleg mangel.
– Det verkar overdrive. Særleg for ein hytte som kostar 1,3 millionar kronar. Då kan eg nesten la vere å selje.
Ragnar Lie er hytteeigar i Hurdal. Han har problem med å få selt hytta med endringa i avhendingslova.
Foto: PrivatLie betalte 15.000 kroner for tilstandsrapporten. I tillegg har han trekt frå 200.000 på taksten. Det er fordi han reknar med at rapporten vil trekke ned verdien til hytta.
No er han redd dei godt dokumenterte feila vil skremme vekk endå fleire kjøparar.
– Eg opplever at det er stor skepsis no, men det kan vere at problemet er mellombels. På eit tidspunkt kjem alle rapportar til å vere like grundige som min, seier hytteeigaren.
Ser kjøparar flykte frå dokumentbunkane
Advokat og eigedomsmeklar Arne Talsnes fortel at han har opplevd at kjøparar trekkjer seg når dei frå sjå dei store bunkane med feil og manglar som lovendringa krev.
For alle bustader har manglar. Og det ser gjerne verre ut på papiret enn det eigentleg er ifølge eigedomsmeklaren.
Men på eit tidspunkt reknar han med at bustadkjøparane vil venne seg til dei store dokumentbunkane.
Norsk Hyttelag AS har tidlegare fortalt NRK at dei forventar at lovendringa vil føre til fleire rettssaker. Før ein har funne ut kvar ansvaret for uventa feil ligg, må nokon vere prøvekanin i retten. Det er eigedomsmeklar Talsnes samd i.
I tillegg trur han lovendringa gjere det dyrare å selje hytta. Dei lovpålagde kostnadane vert høgare. Då kan det vere at hyttene også blir dyrare.
– Det kostar mykje å hente inn informasjon. Men det blir tryggare å vere bustadkjøpar. Det er den vurderinga lovgivinga har gitt.
DNB Eiendom: – Ikkje sett den store verknaden
Fagansvarleg på fritidseigedom i DNB Eiendom i Lillehammer, Elin Merete Tofthagen, har derimot ikkje sett den store kjøparflukta.
DNB Eiendom har brukt dei nye tilstandsrapportane sidan oktober, og Tofthagen seier det ikkje har verka inn på kjøparinteressa.
– Vi har ikkje opplevd at kjøparane rømmer frå dokumentbunkane.
Tofthagen avviser òg at lovendringa vil gjere stor inngriping i hytteprisane.
– Dei nye tilstandsrapportane er kanskje fire-fem tusen kronar dyrare, men forsikringane har blitt litt dyrare. Likevel er det ein marginal auke med tanke på salsprisane i hyttemarknaden, seier Tofthagen.
Ragnar Lie i Hurdal vurderer no å la vere å selje hytta si. Det er fordi hyttesal har blitt både dyrt og vanskeleg.
Foto: BJØRN SØRHEIM / InvisoHo trur lovendringa er til det betre. Sjølv om det kan gjere til at seljar får lågare pris enn han hadde rekna med, når det blir avdekka feil og manglar ved hytta.
– Eg trur ikkje det skremmer kjøparane, men på kort sikt kan det kanskje skape litt problem for seljar, seier eigedomsmeklaren som peiker på at med bustadforsikring kan hytteeigarar likevel gå ut av eit trygt bustadsal.
– Risikoen blir større for seljar
Om Ragnar Lie i Hurdal skulle ha gjort salsprosessen på nytt ville han tatt ein gjennomgang og fått retta opp dei verste feila før han bestilte takstrapport.
– Risikoen blir større for seljaren. Mest sannsynleg vil kjøparane venne seg til dei nye rapportane, men i ein overgangsfase kjennest dette veldig vanskeleg, seier Lie.
Foto: BJØRN SØRHEIM / invisoPå søndag skal han ha visning. Då får han sjå om det kjem nokon som er interessert i hytta.
– Eg har jo glede av hytta. Kjem det ikkje folk, får eg berre behalde ho.
Har du tips?
Har du tips til andre saker eg burde så nærmare på? Tidlegare har eg skrive saker om mellom anna Dayo som blei kasta ut om han ikkje fekk rett jobb, mysteriet om den forsvunnede sjøkabelen og sjøfugl som forsvinner fra Lofotenl.
