Vegen blir ikkje opna i dag

Alle vegane til Geiranger er no stengde.

I går kveld gjekk eit hundre meter breitt skred over vegen mellom Eidsdal og Geiranger. Odd Einar Hjellen i vegvesenet seier geologen har vurdert forholda.

– Det bles mykje på staden, og inne i mellom går det framleis nokre små skred, så snøskredfaren er betydeleg. Det er verken plass eller vêr til å arbeide der no, så vegen blir i alle fall stengt ut dagen, seier han.

Ein brøytebil køyrde inn i raset, og bilen blei kasta sidelengs, men sjåføren kom seg ut utan skade.

• Les også: Brøytebil treft av snøskred

Vegen mellom Eidsdal og Geiranger blir ofte stengt når det er stor snøskredfare i området.

Før oppryddinga kan starte må geologar og lokale fagfolk vurdere skredfaren. Ifølgje seksjonsleiar i vegvesenet, Ole Jan Tønnesen, kan det ta tid å rydde opp i snøskredet.

– Dessutan er det jo ein ryddejobb som må gjerast når det har gått eit skred med ei breidde på 100 meter over vegen, seier Tønnesen.