– Det er typisk møringar å tilpasse seg

Tysdag la Norges Rederiforbund fram ein rapport som viser at offshorerederia ventar ein nedgang i omsetjinga for første gong sidan 2002. Offshoreskip er lagt i opplag, fleire tilsette er permitterte og bygging av skip ved norske verft er utsett. Dagleg leiar i Maritimt Forum Nordvest, Arnfinn Ingjerd, er likevel optimist.

– Vi må vere budde på ei forbigåande tøffare tid i nokre månader. Nokre snakkar om 10 månader, andre om 20 månader. Det som er sikkert er at vi veit at det går opp og ned i maritim bransje, seier Ingjerd.

LES OGSÅ:

• – Billigere å ha skip i opplag enn i drift
• Kan bli flere permitteringer i offshore-bransjen

Havet er løysinga

Det spesielle er at oppgangen har vart svært lenge og veksten i den maritime næringa i Møre og Romsdal har vore eventyrleg dei siste 10 åra. Sjølv om fleire reiarlag har måtte lagt båtar i opplag, trur Ingjerd det på lengre sikt er behov for alle båtane.

– Havet er mykje av løysingane kloden står ovanfor og klynga på Møre er budde på å vere med på utviklinga. Vi har teknologien og kompetansen og driven, seier Ingjerd.

Satse på nye marknader

Han er rimeleg sikker på at den maritime næringa med reiarlaga i spissen har ei god framtid. Å sjå etter nye marknader har den maritime næringa vore flinke til dei siste åra. I tillegg til offshoremarknaden trur Ingjerd vindkraft offshore, oppdrett offshore og gruvedrift kan vere satsingsområde.

– Det er typisk møringen å vere flinke til å gripe moglegheiter og tilpasse seg, seier Ingjerd.