– Vi må ha ein katt som gir gass!
Stemma til kursleiar Inger Bakke gjallar høgt i skulegarden i Volsdalen i Ålesund. Og skrattinga til alle lærarane ute på asfalten blir like høglydt når Jan-Åge Moe kjapt melder seg til å vere katten.
Og dermed er kattens jakt på musa i gang. Leiken er i gang. Både pulsen og humøret stig mot eit topp-punkt.
– Vi treng ikkje avkopling. Vi treng påkopling. Leiken gjer noko med oss. Og det er ufatteleg kor små ting vi kan gjere, seier Inger Bakke og utfordrar kursdeltakarane til meir leik og fysisk aktivitet.
– Lærer gjennom kroppen
Det er Sunnmøre Friluftsråd som har teke initiativ til å få endå meir leik inn i skulekvardagen.
Friluftsrådet meiner leiken gjer noko med oss. Og dei ser på skulen som ein viktig måte å få barn til å gjenoppdage leikane som tidlegare var med på å prege livet i skulegardane.
– Vi har på ein måte gløymt kor viktig leiken er. Barna sit mykje i ro. Men vi kan lære så mykje gjennom kroppen vår, gjennom det å leike med kvarandre, seier kursleiar Inger Bakke.
– Sit mykje stille
Frykta er at mobiltelefonen og datamaskinene har teke over mykje av tida til barna. Gjennom kommunikasjon på skjermane får mange barn fylt behovet for både kontakt og leik.
Men ifølgje friluftsrådet fyller leik heilt andre behov. Særleg er uteleiken unik fordi den utviklar eit samspel mellom menneske, sjølve leiken og naturen rundt oss.
Uteleik medverkar til sosial forståing, initiativ, utforsking, robust rørsle, er sansemotorisk stimulerande, fantasieggjande, skaper samkjensle, tryggleik og triggar strategisk tenking, hevdar friluftsrådet.
– Det er mykje stillesitjing. Det er det dei har lyst til, eller dei trur det er dette dei har lyst til. Dei har kanskje ikkje repertoaret inne. Det er dette vi må hjelpe dei med, seier kursdeltakar og lærar Marita Hagen Kvalsvik.
– Tradisjonelle leikar kan forsvinne
I prosjektet «Slå på ringen» handlar det også om dei gamle barneleikane.
Friluftsrådet legg vekt på kor moro der er å halde på med dei, dei skal vere enkle å lære og kan varierast i det uendelege.
I tillegg er dei, ifølgje friluftsrådet, ein viktig del av vår kulturarv og dermed også ein del av vår identitet.
– Eg synest at det er viktig å ha fokus på tradisjonelle leikar. Desse leikane er i ferd med å forsvinne, seier lærar Jan-Åge Moe.
– Det skjer noko med oss
Friluftsrådet hevdar at det har blitt mindre og mindre av dei gamle leikane i friminutta i skulen. Dermed har også mykje av kunnskapen om uteleikane forsvunne.
No vil friluftsrådet lære lærarane å formidle leiken vidare til komande generasjonar.
– Det handlar også om å utforske og forstå seg sjølv. Det skjer noko med eit menneske om ein gjer dette gjennom eigne opplevingar og ikkje gjennom ein skjerm, seier kursleiar Bakke.