Vil heller køyre lenger enn å sokne til Molde

Då regjeringa varsla kommunereform vart framtida usikker for mange småkommunar. Allereie i årets ferske kommuneplan har Sunndal invitert innbyggjarane sine til å sei si meining om dei bør søke partnarskap – og kvar. Svara har overraska på fleire måtar.

Midt i Sunndalsøra sentrum er det eit vegskilje mellom Nordmøre og Romsdal. Næraste by er Molde. Men kven skal dei gå til viss fylket delast opp i fire regionskommunar?

Fleirtal peikar mot Kristiansund

Eit klart fleirtal i undersøkinga seier at dei bør gå til Kristiansund sjølv om Molde ligg nærare. I undersøkinga er det berre tre av ti som vil koplast saman med Molde, mens seks av ti vil ha Kristiansund som sitt regionsenter. Berre ein av ti peikar mot Trondheim.

– Vi har fått bekrefta at sunndalingane kjenner seg som ein del av Nordmøre, seier assisterande rådmann i Sunndal, Harriet Berntsen.

– Nordmøre viktigare enn køyreavstand

Kjensla for gamle fogderigrensa er viktigare enn køyreavstand for folket i Sunndal. Blant dei 550 som har svart på undersøkinga er det heile 34 prosent som er positive til å dele fylket opp i fire regionskommunar.

– Det er raskast å køyre til Molde, så den byen vert mest brukt. Men det er Kristiansund som er byen vår, seier Erlend Kvalstad frå Sunndal.