Ubalanse i talet på kvinner og menn i Møre og Romsdal, er no grundig dokumentert i ein studie utført av Møreforsking. I aldersgruppa 20 til 29 år er det berre 90 kvinner per 100 menn – færre enn i noko anna fylke.
Veronika Juvik (16) studerer allmenn på Fagerlia vidaregåande skule i Ålesund. Ho vil truleg flytte frå Ålesund når ho er ferdig med vidaregåande.
– Den utdanninga eg vil ta finst ikkje her i fylket, så då må eg nesten flytte. Det blir truleg Oslo eller Danmark, seier Juvik.
Venninna Marie Myhre Valderhaug (16) fortel at ho vurderer å utdanne seg i Ålesund, men begge er samde i at det freistar å reise ut av fylket for å studere.
– Eg har lyst å kome meg ut i verda og oppleve noko anna. I tillegg blir ein meir sjølvstendig når ein flyttar vekk frå vener og familie og må bu for seg sjølv, seier ho.
- Les også:
Vel tradisjonelle yrkesval
Utdanningsutvalet har forsøkt å motivere til yrkesval som tener fylket. Då er det mellom anna viktig at jenter utdannar seg til yrke som gir dei ei framtid i Møre og Romsdal. Til trass for dette viser statistiske at dei fleste 16- åringar vel tradisjonelle yrkesval.
– Vi ser at flest jenter vel studiespesialiserande løp, medan gutane vel meir tradisjonelle handverk- og industrifag som for eksempel byggfag og elektro, seier Sverre Hollen, fylkesutdanningssjef i Møre og Romsdal.
Gunn Berit Gjerde, fylkesvaraordførar, trur det kan vere fleire grunnar til at få unge kvinner vel å busette seg i Møre og Romsdal.
– Det er sjølvsagt eit samansett bilete, men det er klart at vi har hatt eit veldig kjønnsdelt arbeidsliv her i Møre og Romsdal. I tillegg har dei sentrale næringane i fylket i stor grad fokusert på menn, seier Gjerde.
– I tillegg har det tradisjonelt vore veldig mange menn i dei leiande stillingane i politikken, held ho fram.
– Må gjere oss attraktive
Mange kommunar har hatt «Kom heim»-aksjonar, for å prøve og lokke kvinner og menn tilbake til fylket, men mykje tydar på at tidlegare kampanjar har vore mislykka.
Eva Vinje Aurdal, leiar for likestillingsutvalet i Møre og Romsdal, meiner det er viktig at kommunane gjer seg så attraktive som mogleg.
– Vi må slutte å rope kom heim og redd oss. Vi må i staden gi unge kvinner og menn gode grunnar til å flytte heim, seier ho.
For dei to venninnene Veronika Juvik og Marie Myhre Valderhaug kan det bli aktuelt å flytte tilbake til Ålesund etter kvart. Men det er avhengig av at dei har noko å flytte heim til.
– Det er her familien og mange av vennane mine bur, men då må det vere mogleg å få jobb og bustad her, seier Juvik.