Etter tips frå publikum blei ein mann i 50-åra tatt med høg promille på Valle i Skodje seint laurdag kveld. Mannen hadde køyrd seg fast i ei grøft då politiet kom til staden. Mannen var aleine i bilen og hadde ikkje førarkort. Han vart tatt med inn av politiet for blodprøvetaking.
Også i Ulsteinvik blei ein bilførar tatt for køyring i alkoholpåverka tilstand. Personen vart stoppa av ein patrulje klokka 02.00 i natt. Sak blir oppretta
Slåstkamp og husbråk
I Volda oppstod det ein slåstkamp mellom fleire personar klokka tre i natt.
– Ein person vart frakta i ambulanse til legevakt etter slag i ansiktet, seier Per Åge Ferstad, operasjonsleiar i Sunnmøre politidistrikt.
Saka blir etterforska av politiet.
Klokka halv fire måtte politiet rykke ut til husbråk i Skodje. Ein person hadde gjort skadeverk i ei leilegheit og slått til ein annan person. Sak blir oppretta.
Vist vekk frå sentrum
Like etter klokka tolv vart ein mann i 20-åra frå Eide vist vekk frå ein utestad i Molde. Mannen laga bråk og nekta å gå.
Litt seinare vart ein annan mann i 20-åra, denne gong frå Vestnes, også vist vekk frå ein utestad i Molde, etter at han også laga bråk og nekta å gå.
Festbråk
Politiet rykka ut til ei leilegheit i Kristiansund sentrum like før klokka to på grunn av klager på bråk frå ein fest.
Der fann dei ei kvinne i 40-åra som var så alkoholpåverka at ho måtte køyrast til legevakt.
Også i Molde heldt ein ungdomsfest naboane vakne. Festen vart avslutta av politiet i totida natt til søndag.
Tenåring slått i ansiktet
Ein mann i 20-åra frå Nesset blir meldt til politiet etter å ha slått ein person i tenåra i ansiktet. Ungdomen frå Sunndal fekk tannskadar som følgje av slaget.
Like før klokka halv tre vart ein mann i 50-åra frå Sunndal slått ned på Sunndalsøra. Gjerningsmannen, ein mann i 20-åra frå Nesset blir meldt til politiet.
Gjorde skade på ein politibil
Rusa kvinne i Kristiansund
Like før klokka fem vart ei kvinne i 20-åra frå Kristiansund sett i drukkenskapsarrest. Kvinna var rusa og ute av stand til å ta vare på seg sjølv.
