– Dette blir ei flott påske

Mange trudde at det gjekk mot ei snøfattig påske. Mesteparten av snøen som kom tidlegare i vinter var smelta bort. Men i indre og høgareliggande strok skulle det berre ei snønatt til for naturen vart skinande kvit.

– Her på Haugsetra i Ørskog er det kome snø. Dette blir ei fin påske, skriv Tone A. Bjerkevoll i ein e-post til NRK Møre og Romsdal.

Dette biletet er teke i dag, øvst i Romsdalen. Snøen kom i natt og har lagt seg som eit kvitt teppe over landskapet.

– Her køyrer brøytebilane i eitt sett, seier Marit Elise Brudeli til NRK Møre og Romsdal måndag morgon. Ho bur øvst i Romsdalen, mellom Verma og Bjorli.

• Har du fleire snøbilete? Send dei til oss her

Dette er vêrmeldinga for måndag:

Nordvest liten og periodevis stiv kuling utsette stader, noko minkande i kveld. Regnbyer, snøbyer i høgda.

• Sjekk vêret der du er
• Sjå oppdaterte bilete frå vegane

NRK Møre og Romsdal oppdaterer artikkelen etter kvart som det kjem inn fleire bilete frå lesarane våre.

• Fortvil ikkje: Meteorologen lovar finver i påska

Også på Bjørke i Hjørundfjorden snør det tett måndag morgon. Perry Bjørke melder at snøen dalar så tett at det rett og slett er vanskeleg å få festa snøtilhøva til eit fotografi.

– Det er ikkje lett å ta bilete når det snør so tett. Men her er eit synleg prov på snø i indre strok. Dette har ikkje meteorologane fått med seg. Vi snøvar heilt ned her i alle fall, skriv Perry Bjørke i ein e-post til NRK Møre og Romsdal.

Frå fleire stader i indre og høgareliggande strøk kjem det meldingar om vanskelege køyretilhøve til måndag morgon. Ingvild Ruland i Sunndal melder om snøslaps i vegen. Og ho har fanga dette motivet frå elvelandskap i snødryss: