Dårleg vêr førte til nesten skadefri påske

Årets påske viste seg ikkje frå si beste side. I alle fall ikkje vêrmessig.

På store delar av Austlandet har det vore regn og overskya, og sola har knapt vore å sjå.

For Røde Kors har desse feriedagane vore rolegare enn på lenge.

– Vi har hatt nokre skadar, og det er det kvar påske. Men ikkje noko av dei store hendingane, seier Stian Michelsen, som er operativ leiar i Telemark Røde Kors.

Sjølv om mange folk har vore ute, har dei truleg ikkje lagt ut på dei lengste turane, trur han.

– Ut og lufte seg, og så slappe av litt igjen.

Den «normale påska»

Ei meir roleg påske er den nye normalen, meiner Michelsen. Før pandemien var høgtida travel.

– Det verkar som at folk overvurderte evnene sine og tok vesentleg større sjansar, enn det dei gjer no.

Sjølv om ein ikkje kunne vere ute i skianlegga, var folk framleis ute i terrenget og gjekk på ski under korona-tida.

For Michelsen verkar det som at vi nå tek betre val og planlegg turane betre.

Trass i ei stille veke for hjelpemannskapa, ligg dei ikkje på latsida, forsikrar Michelsen.

– Det er ferskvare, på lik linje med mykje anna. Det går mykje i trening og vedlikehald av utstyr.

197 oppdrag

Kort sagt har påska for Røde Kors bestått av 197 oppdrag og 273 skader.

Blant desse er det 160 henteoppdrag, 21 søkeoppdrag, 3 skred og 13 andre oppdrag.

Det er færre skadar enn normalt, ifølge Røde Kors.

Gjennomsnittleg pleier det å vere meir enn dobbelt så mange skadar i påska, enn det som er registrert i år.

Fram til langfredag hadde dei frivillige vore ute på 140 oppdrag.

Telemark er på skadetoppen i landet og i Drangedal fekk dei ein spesielt travel dag på skjærtorsdag, med heile 12 skadar.

Skadane kom etter ein årleg afterski ved Gautefall skisenter.

– Det var fyll og fest, stort sett, sa kommunikasjonsrådgivar Kjersti Veel Krauss til NRK førre veke.

• Skianlegg fleire stader i landet melder om full gass når skibakken stenger. Nokon står ikkje eingong på ski, men er berre med på afterski.