I ungdomstida var Mats Grimsæth ein rastlaus gut med mange tankar. Han passa rett og slett ikkje inn i skulesystemet.
– Eg visste ikkje korleis eg skulle snakke om rastløysa mi og kjente at eg ikkje dugde til å gjere noko som helst. Vendepunktet for meg var havet.
På eventyr på havet kjente Grimsæth at han fann sin plass. Han fann ein annan type ro, fekk sortert tankane sine og kjent på meistring, glede og tilhøyrsel.
No tek han med seg ungdomsskuleelevar på sitt neste prosjekt.
- Her kan du lese saka om Lukas (13) som sleit med konsentrasjonen. Men skulen fann ein løysing.
Ein meir aktiv skulekvardag
Kvar veke får Grimsæth besøk av unge frå Skodje ungdomsskule som treng ein meir aktiv skulekvardag.
Saman med båteigar Roger Hofseth jobbar dei med restaurering av ei gammal skøyte frå 1978 på motorfabrikken Nogva i Søvika på Sunnmøre.
No lengtar skøyta etter å komme ut på havet igjen, og det skal ungdommane hjelpe den med.
– Eg har hatt ein draum om å skape eit tilbod for ungdommar utanfor skulebenken, seier han.
– Vi treng fleire tilbod
Rektoren ved Skodje ungdomsskule, Trond Herje, seier at dei er positive til prosjektet med Grimsæth, som begynte i desember 2023.
– Vi treng fleire «Mats-ar», men dette er ein god start. Han jobbar med kvar enkelt, bygger gode relasjonar og gir dei trua på seg sjølv igjen.
Det heile starta som eit samordna rus og kriminalførebyggande tiltak. Det er eit nytt prosjekt som har ført til at fleire ungdommar har blitt på skulen, fortel rektoren.
Også dagleg drivar i Dale Oen Academy, Per Kristian Bratholm, heiar på Mats Grimsæth. Akademiet tilbyr eit pauseår for ungdommar mellom 15–20 år fleire stader i landet.
– Vi ser at fleire burde gjere som Mats og oss. Vi treng fleire tilbod i Ålesund. Det å oppleve meistring og samhald er noko alle menneske treng.
Bratholm har ei klar oppfordring til ungdommane.
– Det at du ikkje lykkast på skulen, treng ikkje å bety at du ikkje kan lykkast i livet.
- Fekk du med deg saka om at Averøy kommune satsar på gutar si psykiske helse?
Vil styrke den praktiske skulen
– Vi veit at fleire og fleire barn og unge fortel at dei ikkje er motiverte. Mange går ut av ungdomsskulen med resultat som gjer vegen vidare krevjande.
Det seier kunnskapsminister Kari Nessa Nordtun (Ap). Ho meiner at tida er moden for å gjere 5.–10. trinn meir praktisk og variert, slik at elevane kan lære meir og trivast betre.
For å bidra til det gir regjeringa 127 millionar kroner til skulane slik at dei kan satse på den praktiske opplæringa.
Ho meiner det er viktig at den enkelte skulen ser behova til elevane, og sett av ressursar sånn at elevane skal ville fullføre skuleløpet.
– Mats og Skodje ungdomsskule tilbyr ungdomane eit spennande tilbod. Det er viktig å nytte seg av nye type ressurspersonar for å bidra til auka motivasjon blant elevane.
Nordtun seier at dei i år skal legge fram ei stortingsmelding kor deira klare mål er at skulen skal bli meir praktisk og variert.
Tilbake på skøyta i Søvika går dagens arbeid føre seg for fullt. Mats Grimsæth og ein av ungdommane skal få på plass ein ny kloss.
Klossen passar til slutt, akkurat slik den nye, meir praktiske kvardagen passar betre for ungdommane.