Endeleg obduksjonsrapport er klar etter at mann døydde i Ålesund

Spesialeininga for politisaker har no mottatt den endelege obduksjonsrapporten av mannen i 30-åra. Det blei også gjennomført toksikologiske undersøkingar.

– Eg ønskjer ikkje å gå inn på innhaldet i desse rapportane no. Dette får vi eventuelt kome tilbake til på eit seinare tidspunkt i samanheng med totalvurdering av saka, seier Thomas Arntsen, etterforskingsleiar i Spesialeininga til NRK.

Basketak med politiet

Det var laurdag 28. januar at politiet blei varsla om ei hending i sentrum av Ålesund. Dei fekk melding om ein blodig og tynnkledd mann som kraup i vegbana.

Politiet meinte at mannen var til fare for seg sjølv og andre, og rykte ut for å få kontroll på han.

I samband med dette oppstod det eit basketak mellom mannen og to sivilkledde politibetjentar, og han blei så lagt i bakken. Etter kvart kom det også privatpersonar til, som hjelpte politiet å få kontroll på mannen.

På eit tidspunkt etter dette blei det gitt livreddande førstehjelp på staden. Ambulansen kom også til og mannen blei etter kvart frakta til sjukehus.

Seinare på dagen meldte politiet at mannen var død.

I sosiale medium sirkulerte det fleire videoar av hendinga Som følge av dette oppstod det i etterkant spørsmål og spekulasjonar rundt politiet si handtering av saka.

Mellom anna gav operasjonssentralen feil informasjon om hendinga, noko som også bidrog til dette.

Måndag 31. januar valde politiet i Møre og Romsdal å melde saka til Spesialeininga.

Mistenkt for tenestefeil

Sidan januar har Spesialeininga etterforska for å finne ut om det er ein samanheng mellom politiet sin framgangsmåte og dødsfallet.

Spesialeininga har mellom anna gått gjennom videoar frå hendinga og lydopptak frå politiet sin kommunikasjon. I tillegg har dei avhøyrt vitne og politiet.

To politibetjentar blei mistenkt for tenestefeil i samband med hendinga. Dei har framleis same status.

Ferdig etterforska

Arntsen i Spesialeininga opplyser at dei ser på saka som ferdig etterforska.

– Etterforskingsavdelinga vil innan kort tid sende over si innstilling til sjefen for Spesialeininga, som skal fatte påtaleavgjerda i saka.

Det er venta at dette vil kome om nokre veker, men Arntsen kan per no ikkje seie konkret når dette vil kome.

– Det vil truleg ta litt tid å gå gjennom saka og vurdere den for påtaleavgjerd. Det har vore ei ganske omfattande etterforsking i saka og mykje materiale som er henta inn.

Etterforskar kva som skjedde i forkant

Politiet i Møre og Romsdal har hatt ansvaret for å etterforske kva som skjedde med mannen før han blei observert blodig i Ålesund sentrum.

Politiet har mellom anna gjort undersøkingar i leilegheita til mannen. Han budde i nærleiken av der han først blei observert.

Linn Erstad, seksjonsleiar for etterforsking i Møre og Romsdal politidistrikt, fortel at også dei er ferdige med sin del av etterforskinga.

– Vi har sendt dette over til Statsadvokaten, som igjen ønskjer å vente på den endelege avgjerda frå Spesialeininga, seier Erstad.