Familien fekk bu gratis i Geiranger: – Sjølvsagt vil vi bli!

– Det er mykje å gjere her, vi kan for eksempel gå tur i fjella!

Det seier åtte år gamle Robyn. Ho er den yngste i familien Mergan-Vergote, som kom til Sunnmøre ein kald vinterdag i år.

No er familien, beståande av mor Twyla, far Wouter og storesøster Mona (11), klare for å bli verande.

Dei kom til Norddal gjennom prosjektet Arctic Digital Nomads Stipend, som Geiranger i Noreg, þingeyri på Island og Vágur på Færøyane er saman om.

Det går ut på at folk som kan ta med seg jobben kor som helst, kan søke om å bu gratis i ein til tre månadar. Dei får også gratis kontorplass i eit fellesskap.

Prosjektet starta i fjor, og til saman 15 personar fekk flytte til Sunnmøre.

Familien på fire var av dei utvalde, og har no vald å bli att.

– Eg synest dette burde bli ei årleg greie. Vi bygger eit samfunn med fleire digitale nomadar rundt Geiranger, Eidsdal og Norddal, seier familiefar Wouter Vergote.

Dei har ingen planar om å vende tilbake til heimlandet Belgia med det første.

– Sjølvsagt vil vi bli! Vi kom jo nettopp. Familien vår har det bra her.

Vil få fleire til bygda

Fleire aktørar står bak prosjektet, mellom andre Stiftinga Geirangerfjorden Verdsarv.

Elsa Ragni Yttredal er kunnskaps- og forskingskoordinator der, og forklarer at dei var med på dette for å få fleire til bygda.

– Det er mange ledige hus, vi manglar folk, og vi vil jo gjerne treffe nye og tilby det fine som bygda kan gi.

No har dei lyst ut endå eit stipend, og for Yttredal har responsen har vore over all forventing.

I fjor kom det 300 søknader og portalen knelte.

– Vi var jo heilt overraska og ikkje førebudd på suksess. Det ramla inn e-postar frå nord og sør og aust og vest, ler ho.

No har dei fått ekteparet frå Belgia til å lage ein ny søknadsportal gjennom marknadsføringsfirmaet sitt.

Berre ei veke inn i den opne søknaden, hadde dei fått inn over 1300 søknadar, fordelt på Noreg, Island og Færøyane. Fristen for å søke er 15. oktober.

– Vi treng ikkje tusenvis av folk hit, men for å oppretthalde det sosiale tilbodet for oss som er her, så er det kjekt å få nokre fleire hit.

Familien Mergan-Vergote ønsker at fleire skal gjere som dei. Derfor har dei engasjert seg i årets søknadsprosess.

– Sosiale medium gjer at søkarane kjem frå heile verda, seier Twyla Mergan.

Vidare forklarer ho at dei kjem frå land som Russland, Ukraina, Tyskland, England, Belgia, Spania, Portugal og Canada.

Men dei ønsker også at folk som bur i meir sentrale strøk i Noreg skal søke.

Ein ny kvardag

Det tok ikkje lang tid før søstrene Robyn og Mona starta å føle seg som heime i Norddal.

– Eg likar det veldig godt, og eg er veldig glad for å vere her, seier Mona.

Dei to jentene går på skulen og får private norsktimar. Og leksene består av å lære seg norske ord.

– Pink er rosa, yellow er gul, blue er blå. Eg likar å lære norsk og eg har ein flink lærar, seier eldstejenta Mona.

Ho seier at ho har fått betre vennar i Norddal enn ho har hatt nokosinne, og fekk til og med synge i den lokale skulemusikalen.

Nokre av sitata er omsett frå nederlandsk og engelsk, men innhaldet er det same.