Jenny (17) kan bli den yngste folkevalde politikaren i landet

Hadde Jenny Alvestad Aarnes vore fem dagar yngre, kunne ho ikkje ha stilt på liste til kommunevalet i år.

17-åringen er nemleg fødd 27. desember 2005. Ho er akkurat innanfor grensa til å kunne bli lokalpolitikar i Haram.

Men pågangsmotet og engasjementet er det ingenting å seie på. Aarnes er klar på at ho vil vere med å bestemme korleis heimkommunen skal vere.

– Eg berre: «Ja, eg vil stille på topp», seier Aarnes.

– Litt skummelt, men spennande

Ho ønskjer å få ned forskjellane blant folk, og ha særleg fokus på skulepolitikken.

– Så ein får same moglegheiter som dei rundt seg, og får vere med på dei same sosiale tinga – uavhengig av kvar foreldra dine er frå eller kor mykje pengar dei har.

Listetoppen kryssar fingrane for at ho blir vald inn.

– Det er litt skummelt når det er ein liten kommune som Haram, men eg trur det blir spennande. Det blir gøy å vere med å påverke plassen eg har vakse opp på, og gjere det til eit fint miljø for andre å vekse opp i, seier ho.

Heimplassen hennar, Haram, vart i 2017 tvangssamanslått med Ålesund kommune, til stor fortviling for fleire.

I fjor vart det derimot klart at Haram skal få bli ein eigen kommune igjen. Det skjer neste år, i 2024.

Aarnes er derfor klar for å få inn SVs politikk i den nye kommunen.

– Nokså uvanleg

– Trenden dei siste tjue åra er at kommunestyra blir eldre og eldre.

Det seier Bjarte Folkestad, som er valforskar ved Høgskulen i Volda, medan han viser oss ein graf. Han meiner det kan føre til at avgjerder som blir tekne i kommunane ikkje er i favør dei unge.

– Ungdommen blir på mange måtar dobbelt-taparar i dette. Dei har låg deltaking i politikken, men også låg representasjon.

Valforskaren seier at det tradisjonelt er partia på venstresida i politikken, som Raudt og SV, som har flest unge på listene sine.

Men at ei som fyller 18 år i utgangen av året står på topp for eit parti - det er ikkje normalen.

– Det er nokså uvanleg. Her snakkar vi om eit nokså unikt tilfelle der du har ein veldig ung kandidat som står på toppen av lista. Men vi har også hatt døme på unge kandidatar som står på topp, og som blir ordførar.

– Vi er ikkje heilt på same side

Engasjementet til Aarnes har komme inn med morsmjølka. Mor hennar er nemleg lokalpolitikar for Senterpartiet.

– Det har vore litt debattar heime. Vi er ikkje heilt på same side i politikken, seier ho og ler.

– Men ho har alltid oppmoda meg til å tenkje sjølv. Diskusjonar heime har fått meg til å innsjå kva eg meiner sjølv, og kva eg ikkje meiner. Så eg trur det har vore ein veldig bra påverknad at mamma og andre i familien min har vore politisk engasjert.

– Hadde du vore like politisk engasjert dersom mor di ikkje var det?

– Eg veit ikkje. Som det er no trur eg at eg hadde vore politisk engasjert uansett. Men det er vanskeleg å seie korleis eg hadde utvikla meg om det ikkje var nokon diskusjonar og debattar ved middagsbordet, seier Aarnes.

– Lykke til

Kommunedirektør i Haram, Anders Norvald Hammer, seier dei er godt i gang med å lage den nye kommunen. Også han har teke ein kikk på dei ulike partia sine kandidatar.

– Det ein kan tolke ut av vallistene er at vi får ein god miks av erfarne politikarar, som både er politikarar i dagens kommune og var det i tidlegare Haram kommune, og så er det flott å sjå at vi får nye politikarar inn som ikkje har den same erfaringa.

Og at dei har den yngste listetoppen i landet er «berre kjekt», seier han.

– Eg ønskjer henne og alle andre politikarar som står på liste i Haram lykke til i valkampen. Eg håpar dei som lykkast og blir valde inn, blir ein del av eit godt kommunestyre som gjer gode val for innbyggjarane i kommunen i framtida.

Les også: Thilde (21) dropper ut: – Føler at ingen voksne bryr seg om unge