Håper på utseld handballfest

Hopp til innhold

Neste veke er det klart for handballfest når ein rekke internasjonale handballkampar blir spelt i Ulsteinvik.

Det er i år 70 år sidan det første gongen vart spelt handball i IL Hødd. Jarl Martin Møller er leiar for Hødd si handballgruppe. Han synest dette er den beste jubileumsgåva handballgruppa kunne fått.

– Interessa for billettane er veldig stor. 2100 billettar vert selde til kvar kveld det er handballkampar neste veke, seier han.

Møller trur det blir utselt alle desse tre kveldane.

– Det er selt ganske mange billettar frå i dag til i går, så eg både håpar og reknar med det, seier han.

Les også: Gleder seg til å få heltene på besøk

Stort dugnadsarbeid

Møller er svært imponert over dugnadsinnsatsen i klubben. Over 120 frivillige, både store og små, er med for å hjelpe til.

– Det er mykje arbeid og dugnadsånd som ligg bak. Ein klubb som Hødd er avhengig at folk stiller opp, seier han.

Rudy Amundsen er leiar for dugnadsgjengen. Han seier logistikken har vore den største utfordringa.

– Det å samle folk på dagtid i feriemånaden juli er ikkje berre enkelt, seier han.

Tunge løft

Innsatsen er uansett upåklageleg. Hans Olav Vattøy var ein av dei som var på plass i Ulsteinhallen torsdag, frå tidleg morgon til seint på kveld.

Det vart ein del tunge løft både på han og svogeren Harald Åsland Riise, men ikkje verre enn at dei skulle greie seg. Vattøy var likevel litt spent på korleis kroppen ville vere morgonen etter.

– Vi har vore her i nokre timar no så sveitten har byrja å drive. Men vi er ikkje ferdig enno, så verre vil det nok bli, seier han lattermild.

Ulsteinhallen er heilt ny, men først og fremst ein friidrettshall og ikkje ein handballhall.

Tribuneseksjonar er no sett opp på begge langsidene, og på den eine kortsida.

2100 stolsete er så plasserte oppå desse seksjonane. I tillegg er det rulla ut eit eige banedekke som er fritt for oppmerkingar til alle moglege idrettar. Dekket er difor "reint" og tilpassa internasjonale handballkampar.