I 18.30-tida fredag kveld fekk brannvesenet endeleg kontroll over bråtebrannen som spreidde seg ute av kontroll i Hallebygda på Sunnmøre.
Frykta skogbrann
Det var klokka 17.10 fredag at politiet først melde om ein bråtebrann som hadde kome ut av kontroll i Hallebygda i Sande kommune på Sunnmøre. Alle naudetatane rykte ut til staden og mannskap frå fleire stadar deltok i sløkkingsarbeidet.
Ei løe brann ned som følgje av brannen. Bråtebrannen var også på veg mot eit nærliggande hus, men brannvesenet greidde å stoppe brannen før den nådde så langt.
Det starta også å brenne i terrenget ved skogen, og brannvesenet frykta at det ville spreie seg vidare til skogen.
– Vi jobbar no på spreng for å hindre dette, sa Frank Ausdal, operasjonsleiar for 110-sentralen i Møre og Romsdal til NRK klokka 18.30 fredag kveld. Om lag ein halvtime seinare begynte brannvesenet å få kontroll på brannen.
Vurderte å sette inn helikopter
Både frivillige og personar frå brannvesenet deltok å sløkkingsarbeidet. Brannvesenet vurderte på eit tidspunkt å sette i helikopter, men fekk kontroll på brannen før dette blei nødvendig.
Ifølgje Vestlandsnytt skal det ha vore fleire køyretøy i løa då den brann ned.
Fleire grasbrannar på Sunnmøre
Like etter klokka 17.00 blei det også meldt om ein grasbrann på Leinøya i Herøy. Brannen oppstod midt i eit bustadfelt, men brannvesenet fekk raskt kontroll på situasjonen.
Også i 14.00-tida fredag måtte brannvesenet rykke ut etter at ein bråtebrann kom ut av kontroll på Nøystøylen i Åram. Der klarte dei å berge eit naust som stod i fare for å ta fyr.
Fleire stadar på Sunnmøre har det i dag blitt gjennomført kontrollerte bråtebrannar. Desse har skjedd på Haddal i Ulstein, Bjørnøya i Haram, Raudøya i Ørstafjorden og i Kvalsvika i Herøy.