Cruisesesongen er for alvor i gang. I halv åttetida klappa det staslege skipet «Britannia» til kai i Ålesund. Skipet er nesten heilt nytt, og blei døypt av Dronning Elisabeth i mars i fjor. I dag strøymer 4000 cruiseturistar ut i gatene i Ålesund.
På Blixvalen på sørsida av Ålesund står eit ektepar og speidar inn på dei snødekte sunnmørsfjella. Med iPaden fotograferer dei kvarandre mens sola blenkjer i den stille Aspevågen. Og i bakgrunnen ligg skipet dei er passasjerar på.
– Dette er vakkert. Det er unikt. Og det er forskjellig frå alt anna. Og vi hadde så lyst å sjå Noreg, seier Valerie Sawkins til NRK.
- Sjekk oppdatert informasjon om cruiseanløp i Ålesund
- Sjekk oppdatert informasjon om cruiseanløp i Geiranger
- Sjekk oppdatert informasjon om cruiseanløp i Molde og på Åndalsnes
- Sjekk oppdatert informasjon om cruiseanløp i Kristiansund
Ekteparet, som er blant dei næraste naboane til Windsor Castle i Vest-London, har funne seg eit roleg hjørne av byen. Elles er gatene fulle av cruise-turistar på byvandring. Og i trappene til fjellstua går turistane tett i tett.
– Då eg drog frå gardinene på lugaren i dag tidleg såg eg noko av det vakraste eg har sett. Vi segla inn mot byen, og rundt oss var det høge, snødekte fjell på alle kantar, fortel Valerie.
Ekteparet er inne i den tredje veka om bord på «Britannia». Først har dei vore på fjorten dagars cruise i Middelhavet. Og så plussa dei på med ein sju dagars rundtur til Noreg.
– Det er også store kontrastar. Då vi segla ut ved Gibraltar og nordover Biscaya bada vi i sol og høge temperaturar på øvste dekk. Her var det nesten på frysepunktet då vi kom. Men eg likar denne lufta. Dette er verkeleg friskt, seier Frank Sawkins.
«Britannia» kom til Ålesund frå Bergen, og held fram til Flåm og Stavanger før det reiser tilbake til Southampton på 7-dagarsturen.