– Det er fint å sjå kor han vaks opp og kor han trena, seier britiske Kath Linaker.
Då cruiseskipet la til kai i Stavanger stod valet mellom Bryne og Preikestolen.
– Den kan ein vel sjå i ein film, kan ein ikkje? ler ho.
Heime i England kan turistar bli viste rundt på stadion til hennar klubb Everton, men dei har ikkje tilsvarande turistattraksjonar knytt til Wayne Rooney, seier ho.
Og sjølv om fotballhjarta bankar hardast for Everton, måtte ho reise til Bryne.
– Haaland har jo blitt ei verdsstjerne!
- Pøbel har signert gatekunst på Bryne der Erling Braut Haaland er motiv. Bildet blei ferdig i 2022.
Positivt overraska
Linaker var ei av 40 britiske cruiseturistar som måndag hadde meldt seg på verdas aller første «Bryne FK Stadium Tour».
Her fekk dei blant anna besøke garderoben, prøve seg på «dryleveggen» og sjå gatekunsten.
– Eg blei positivt overraska over at så mange har meldt seg på første tur, seier dagleg leiar Hans-Øyvind Sagen i Bryne FK.
Opplegget har Bryne snikra saman med Guidecompaniet og Opplev Jæren. Planen er å tilby guida turar kvar måndag i cruisesesongen.
- I juni overraska Haaland sjølv unge fotballspelarar på eit fritidstilbod på Bryne. Her kan du sjå korleis barna reagerte!
Reiser til Bryne frå Brunei og Brasil
For det var på Bryne fotballstjerna Erling Braut Haaland la grunnlaget for den eventyrlege fotballkarrieren sin.
Og turistane har allereie dukka opp ei stund.
– Alt med Erling har stor interesse, og vi har dei to siste åra hatt mange turistar innom utan at vi har organisert det på nokon måte. Viss vi nå kan bidra med å sette Bryne og Jæren på kartet, så synest vi det er kjekt, seier Sagen.
Ifølge Sagen har tidlegare turistar reist langvegsfrå. Alt frå Brunei i Asia til Brasil.
– Heile verda, seier han.
Dei som har dukka opp, har Bryne FK vist rundt, men nå vil dei gjere det i litt meir ordna former.
I dag fekk dei aller første betalande turistane avslutte turen i supporterbutikken med smaksprøvar på det Haaland har sagt at han likar, nemleg lappar og raud julebrus frå Berentsens brygghus i Egersund.
– Det var veldig godt, tykte Louise Mullen frå Nottinghamshire.
- Erling Braut Haaland blir hylla for korleis han brukar dialekt. I heiagjengen er direktøren i Språkrådet, Åse Wetås.