– Eg har lyst å bli like god som Ada. Verdas beste, det er det eg drøymer om. Det motiverer meg at nokon frå Nordmøre har klart det. Ho har klart det, så kvifor ikkje eg, seier Ifrah Abdullahi Hussein (15) frå Kristiansund.
Ho er ein av 40 jenter frå Møre og Romsdal som blei plukka ut til å delta på familien Hegerberg sine inspirasjonsdagar på garden i Sunndal.
Familien har fått stor merksemd på grunn av suksessen til søstrene Ada og Andrine Hegerberg. Medan Andrine har ei vellykka karriere i ulike europeiske klubbar, har Ada markert seg som ein av dei beste kvinnelege fotballspelarane i verda og vinnar av gullballen i 2018.
Vil at jentene skal ta meir plass
Dette er ingen vanleg fotballskule. I tillegg til å lære meir om fotball, er målet også å bygge opp jentene og gje dei sjølvtillit til å satse på idretten.
– Ein kan vere ein god fotballspelar, men ein treng også andre eigenskapar for å bli best. Det er ei tøff verd og dess høgare nivå ein kjem på, dess tøffare blir det, seier fotballspelar Andrine Stolsmo Hegerberg.
Hegerberg seier ho ønskjer å løfte unge jenter, fordi gutane ofte får meir merksemd.
– Det er viktig å bygge sjølvtillit til å vere seg sjølv. Mange er dårlege til å peike på kva dei er gode på, men veldig flinke til å vere kritiske til seg sjølv, seier Hegerberg.
Frå tidleg alder har Ada og Andrine hatt eit miljø rundt seg der dei har hatt fokus på å bygge sjølvkjensla og å «pushe» seg sjølv til å ta sjansar som andre ikkje har våga.
– På den måten har vi vakse, men vi har sett at andre har blitt forbigått. Desse har vore like gode eller hatt like gode eigenskapar, men dei har ikkje våga å stå heilt fram, seier Andrine Hegerberg.
Over ein tredel fell frå
Det er 53.000 jenter mellom seks og tolv år som spelar fotball, men 35 til 40 prosent av dei forsvinn i aldersgruppa tretten til nitten. Nesten like stor del gutar sluttar også, men dei er nesten dobbelt så mange til å begynne med.
– Det er veldig få jenter på tretten som oppgir at dei vil satse på idretten sin, og vi ser at skule er ekstra viktig for mange. Det er ikkje ein uvesentleg kjønnsforskjell, seier Ane Eide Kjærås, som er prosjektleiar jentesatsinga i Norges fotballforbund.
Dei jobbar mot nettopp å minske fråfallet. Sjølv om det er vanskeleg for mange jenter å sjå for seg ein fotballkarriere, blant anna fordi rollemodellane er mindre synlege, har moglegheitene aldri vore betre meiner Kjærås.
– Kan vere flaut å ikkje lykkast
Siv Gjesdal underviser i coaching og idrettspsykologi på Noregs idrettshøgskole, og har sjølv vore trenar for barn og ungdommar. Ho trur fotballfamilien er inne på noko viktig. Jenter har ikkje dei same føresetnadene som gutar på veg mot ein fotballkarriere.
– Frå dei startar fotballkarrieren som seksåringar får jentene ei heilt anna fotballutdanning enn gutar, det er dårlegare tilbod heile vegen. Erfaringa mi er at dei har vanskelegare for å identifisere seg som fotballspelarar enn gutar, dei berre «spelar fotball», seier Gjesdal.
Dei er også i ein alder der ein fort kan bli usikker på seg sjølv. Jentene må lære seg å feile for å våge å prøve, meiner psykologen.
– Det er flaut eller skambelagt å ikkje lykkast. Og det held ikkje å vere god på éin ting, ein må vere god på fotball, skule, vere pen og levere på så utruleg mange arenaer. Det er nesten umogleg, seier Gjesdal.
Må stå opp for fotballen
– Det har vore mykje tårer og klump i magen, fortel mor Gerd Stolsmo i fjøset på familiegarden, der fotballjentene lærer om søstrene sine oppturar og nedturar.
Mamma Gerd meiner det krev ekstra spisse olbogar å kome seg fram i kvinnefotballen.
– Difor må vi styrke jentene som individ for å dra idretten vidare. Dei må stå opp for idretten sin og ta sine eigne val, seier Gerd Stolsmo.
Stolsmo håpar jentene tek med seg lærdommen til klubbane og nærmiljøa sine.
– Vi har lært om kva haldningar vi bør ha til oss sjølv, positivitet og det å vere trygg. Eg gler meg til å få bruke det når eg kjem heim, seier deltakar Tina Elise Sevaldsen.
- LES OGSÅ: Kvar tredje spelar gir seg i tenåra
Hei!
Har du noko du meiner vi i NRK Møre og Romsdal bør sjå på?
Ta gjerne kontakt med tips! Eg jobbar i Kristiansund og har Nordmøre som fokusområde.