Heime, ståande framme på hylla, har landslagsdebutant Signe Gaupset eit par signerte fotballsko. Signaturen tilhøyrer Ada Stolsmo Hegerberg.
Eit gammalt bilete av Gaupset og Hegerberg er grunnen til at stjerneskotet fekk skoa for eitt år sidan.
No er 18- og 28-åringen teke ut på landslaget saman for aller fyrste gong, åtte år etter at deira første møte blei foreviga.
– Eg ser ikkje på meg sjølv som så mykje eldre enn Signe. Eg kjenner eg framleis er i ein ganske ung alder, seier Hegerberg om biletet i dag.
Ho legg til:
– Men det er vittig.
Under landslagssamlinga viste NRK videoen av Gaupset som fortel om skoa til Hegerberg:
Hegerberg-krav til Gaupset
Dei møtte kvarandre i gruppespelet i meisterligaen i desember då Brann målte krefter med verdsstjernene i Lyon.
Tre minutt på overtid i heimekampen dukka nettopp Gaupset opp og sikra poeng med si 2-2-skåring.
– Eg sa til ho at ho måtte bli tatt ut på landslaget slik at eg skulle få helse på ho, ler Hegerberg.
For at 18-åringen skal få nokon nye sko vil Hegerberg ha noko tilbake.
– Ho får ikkje eit par til med det første. Nokre målgivande pasningar så skal ho få eit par til, smiler Hegerberg.
– Ja, det er på sin plass. Ho har vore snill og gitt eit par signerte sko. Det er på sin plass at ho får noko tilbake for det. Ho skal få nokre målgivande pasningar, svarer Gaupset med eit smil.
Dei målgivande pasningane frå Gaupset til Hegerberg må nok vente litt. Dersom 18-åringen får debuten med flagget på brystet mot Kroatia er det nokon andre ho må servere.
Får Gaupset-debuten? Følg og høyr Noreg mot Kroatia tysdag kl. 18.00.
– Ei moglegheit for Signe
Med både Ada Stolsmo Hegerberg og Caroline Graham Hansen utilgjengelege til returoppgjeret mot Kroatia i Stavanger blir Grainger tvungen til å gjere endringar.
Gaupset sat på benken i 3-0-sigeren over Kroatia, men med skadane og faktum at Noreg har fått eit godt utgangspunkt, aukar sjansane for at landslagsdebuten kjem tysdag.
– Denne kampen er ei moglegheit for Signe og for dei andre spelarane, seier Grainger.
På pressekonferansen før tysdagens kamp mot Kroatia roste landslagssjefen 18-åringen for å vere uredd. Ein eigenskap ho allereie har sett på trening.
– Signe er fryktlaus når ho spelar for Brann. Vi vil at ho skal vere det her også. Vi vil at ho skal vere seg sjølv. Når ho spelar som seg sjølv er ho fri. Og det har vi sett under denne samlinga, seier briten.
Blei skjerma
Før sigeren mot Kroatia fredag blei Brann-spelar Signe Gaupset skjerma frå pressa. Etter kampen sa ho det har vore herleg å kunne fokusere på det viktige.
– Eg har eigentleg ikkje tenkt så mykje på det. Trenarar og støtteapparat har teke seg av det. Men det har vore fint å kunne konsentrere seg om fotball og vere på samling, seier Gaupset.
Før kampen svara landslagssjefen Gemma Grainger på spørsmål om kvifor 18-åringen blei skjerma. Ho seier det var av naturlege grunnar.
– Det er viktig at ho skal finne seg til rette her og kjenne seg komfortabel. Det er viktig at ho kan fokusere på trening og bli kjent med miljøet her.