Regiondirektør i NHO, Torill Ytreberg, meiner det er heilt naturleg at Ulstein og Hareid ser mot Ålesund i det vidare arbeidet med kommunereforma.
Hittil har den nordre og den søre delen av Sunnmøre hatt samtaler kvar for seg, men Ulstein og Hareid signaliserer no interesse for å sjå nordover mot Ålesund. Ytreberg oppmodar dei til å ta skrittet fullt ut.
– Eg trur det blir heilt naturleg. Vegen frå Ulsteinvik til Ålesund blir mykje kortare når Hafast kjem på plass, så det meiner eg er fornuftig, seier Ytreberg.
- Les også: Kommunesamanslåing i Møre og Romsdal
Storkommune på Søre Sunnmøre
Helst hadde ho likt at alle kommunane på Søre Sunnmøre gjekk mot Ålesund.
– Det hadde vore det beste, seier Ytreberg.
Reisetida mellom Ålesund og Ulsteinvik blir mykje kortare dersom det blir bygd ei bru over Storfjorden mellom Sula og Hareid.
– Det vil knyte folk saman og difor bør også kommunane finne saman, meiner NHO direktøren.
- Les også:
- Les også:
Positiv til tre kommunar
Kommunane på Nordre Sunnmøre er i full gong med å greie ut moglegheitene for å slå saman elleve kommunar til ein storkommune. At Ulstein og Hareid henger seg på denne storkommunen er uproblematisk, meiner Ytreberg.
– Dess større denne regionen eller storkommunen blir, dess sterkare blir den. Vi treng eit kraftsenter her på Nordvestlandet, seier ho.
Men reiser du rundt i fjordfylket Møre og Romsdal forstår du raskt at det er ei stor utfordring å teikne nye kommunekart. Kva som blir resultatet av kommunereforma er eit framleis eit ope spørsmål.
NHO har tatt til ordet for å dele Møre og Romsdal inn i berre tre kommunar, noko Ytreberg meiner er realistisk.
– Vi håpar framleis på ei slik ordning, men vi har sagt at det er byane som må vere pådrivarane i dette. Dersom vi får tre store kommunar, så blir det så pass kraft i dei tre regionane at dei kan klare seg sjølv og løyse ein del oppgåver sjølv, seier Ytreberg.
– Men byane må vere pådrivarane, og det vil også omlandet tene på, held ho fram.