– Kvalfangstnæringa har det same problemet som kvitfisknæringa. Havet er fullt med torsk, men prisen er så låg at det snart ikkje er lønnsamt å fiske det.
Det seier Ole Mindor Myklebust, eigar av kvalfangstbåten M/S Kato og dagleg leiar i Myklebust Hvalprodukter.
Tidlegare i dag blei det klart at vågekvalkvoten er uendra, og igjen er sett til fangst av 1.286 dyr.
- Les også:
Det er som venta, meiner Myklebust.
Ole Mindor Myklebust meiner deltakinga i kvalfangsten er for låg.
Foto: Torild Øvrelid / NRKKunne tatt 4-5.000 kval utan problem
– Det er dessverre for lite deltaking i kvalfangsten, noko som er eit resultat av for dårleg lønnsemd, seier Myklebust til NRK.no.
Også i 2013 vil det vere heilt fri fangst av vågekval i alle fangstområda. I 2011 blei 533 av dei 1.286 vågekvalane i kvoten skote. Tala for 2012 er ikkje klare.
– Vågekvalbestanden i Nord-Atlanteren og i våre tilgrensande havområde er i storleik 120.000 til 130.000. Der kunne vi, med fire prosent skattleggingsgrad, tatt opp 4-5.000 kval utan problem.
Då det var fri fangst for 50 år sidan var uttaket over 2.000 kval per år, seier Myklebust.
– Det er i grunnen synd at ein i eit berekraftig økobasert forvaltningssystem ikkje tek meir kval.
– Sjøpattedyra tek og et like mykje biomasse frå havet som det vi tek i land i annan pelagisk og kvit fiske, peiker Myklebust på.
- Les også:
- Les også:
Talet på deltakande fartøy i kvalfangsten har gått nedover. I 2013 blir det om lag 20 båtar som deltek i kvalfangsten.
– Produsentane tek ikkje marknadsansvar
Dei siste åra har det vore om lag 20 deltakande båtar i kvalfangsten. Det vil ikkje bli nemneverdig fleire dei neste åra, meiner Myklebust.
– Det er marknadssituasjonen som vil avgjere talet på fartøy. Om sesongen vil vare lenger er òg opp til marknaden.
– For dei fleste er det berre i juni månad det blir kvalfangst, kanskje litt i mai og juni. Om marknadssituasjonen betrar seg vil ein ha gode moglegheiter til å forlengje sesongen. Det blir veldig aktuelt for oss med M/S Kato.
Han peikar på avgrensa eksport til Japan og mykje alternativ fiske og store kvotar for anna fisk. Likevel meiner han eiga næring ikkje er flink nok på eitt felt.
– Vi er avhengige av at produsentane jobbar meir ut mot marknaden og tek ansvar. Produsentane tek ikkje marknadsansvar, meiner Myklebust.
– Dei har ein etablert marknad, tek inn råstoff og produserer for den marknaden. Ikkje meir. For vårt vedkommande jobbar vi kontinuerleg mot marknaden og ventar ei betydeleg auke i 2013.
Dagleg leiar i Myklebust Hvalprodukter ser med andre ord lyst på framtida.
– Kvalfangsten for vår del dei komande åra ser lys ut. Vi har ikkje grunn til å vere pessimistar i alle fall. Langt derifrå, avsluttar Ole Mindor Myklebust.
