Då den eldre kvinna ikkje kom heim frå sin daglege spasertur i Tennfjord i Ålesund søndag, blei familien bekymra. Først køyrde dei og leita etter henne langs vegen, men timane gjekk og ho dukka ikkje opp. Dermed kontakta dei naudetatane.
– Vi frykta det verste, men kryssa fingrane for at det skulle ende bra, seier sonen Kjetil Otterlei.
– Berga eit liv
Politi, Røde Kors, hundeekvipasje, frivillige og helikopter søkte gjennom natta. For familien var det nervepirrande å ikkje vite kva som hadde skjedd med den turglade 85-åringen, som slit med hukommelsen.
Hjelpa kom ovanifrå, i form av ein varmesøkjande drone.
I 04-tida på natta blei kvinna funnen, fortumla og nedkjølt i mørket.
– I denne situasjonen meiner vi at dronen berga eit liv, seier Sindre Egeness, varabrannsjef i Ålesund brannvesen.
Sparar ressursar
Både politiet og brannvesenet brukte dronar i søket søndag. Denne teknologien har blitt stadig viktigare i redningsarbeid.
I år får alle politidistrikt i landet dronar.
– I første omgang får alle politidistrikt moglegheit til å utdanne inntil seks dronepilotar, og vi reknar med at det ved utgangen av året vil vere i overkant av 100 dronepilotar i politiet, seier politiinspektør Per Øyvind Haugen i Politidirektoratet.
Politibetjent i Møre og Romsdal politidistrikt, Stian Henningsen, har utdanna seg til dronepilot og seier at gevinsten ved å bruke drone er stor.
– Det viser seg å ha stor effekt. Vi sparer ressursar, det er økonomisk og beredskapen aukar betrakteleg, seier Henningsen.
Får betre overblikk
Avdelingsdirektør i DSB, Johan Marius Ly, seier at dronar er eit nyttig verktøy for naudetatane, både for å søke etter sakna, men også i til dømes skogbrannar.
– Dronar kan bidra til å styrke beredskapen. Først og fremst blir det brukt for å skaffe seg eit godt oversiktsbilete av eit større område frå lufta på rask tid, seier Ly.
Sukk gjennom rommet
I Tennfjord kunne familien til 85-åringen puste letta ut då dei fekk beskjeden om at ho var funnen i god behald, ikkje langt unna der ho sist blei sett på ettermiddagen
– Eg høyrde eit stort sukk gjennom heile rommet, seier Kjetil Otterlei.
Mora blei innlagt på sjukehus til observasjon, men kjem heim snart. Sonen er svært takksam for alle som deltok i leiteaksjonen og spesielt er han glad for at dronen var så effektiv.
– Alt slikt utstyr som kan redde liv i leiteaksjonar er berre topp, seier Otterlei.