I dag vart prisen delt ut for fjerde gang, til ei eldsjel som brukar tida si på å legge til rette for at andre skal få oppleve meir friluftsliv. Det er Norsk friluft som står bak utdelinga.
– Eg får frysningar på ryggen. Det er ufatteleg og så artig, seier ei glad Ann Marit Rakstang Vikan. Ho deler prisen med heile 4H-organisasjonen.
4H er ein barne- og ungdomsorganisasjon, som har fokus på natur og menneske. Vikan har vore aktiv i 4H i 21 år, både i nærmiljøet i Tingvoll, men også på fylkesbasis. Ho var ein av tre nominerte til prisen.
Skal bruke pengane fornuftig
Vikan er stolt over å få prisen, med ein pengesum på 50.000 kroner til friluftsføremål.
– Det skal brukast fornuftig. Vi må diskutere det i Grimstadhøgda 4H, seier Vikan.
Grimstadhøgda 4H har bygd opp eit friluftsområde på Årsund i Tingvoll, med blant anna gamme, grillhytte, snikkarbod og naust. Ho kan love at pengane skal gå til noko som varer, som alle brukarane av området får nyte godt av.
Betyr mykje i heile landet
Stortingsrepresentant Jan Bøhler (Ap) er medlem i juryen, og seier at grunnen til at 4H fekk prisen, er at organisasjonen betyr mykje over heile landet.
– Vi har vald ein person som er bilete på anerkjenninga av heile 4H-bevegelsen. På Tingvoll har dei laga ein heil møteplass med mange aktivitetar for barn og unge, seier Bøhler. Han synest den store innsatsen til Ann Marit Rakstang Vikan er verdt ein pris.