Når påskefjellet er på sitt finaste kan det vere freistande å legge inn eit bod på draumehytta.
Men det kan være lurt å ha is i magen. NRK.no har snakka med fjellmeklarar på fleire av dei populære skidestinasjonane i landet. I følge desse kan ein gjere dei beste kjøpa etter at påsketuristane har reist heim.
– Etter påske og fram mot sommarferien kan du vere heldig å unngå konkurranse i bodrunden, seier Marit Wangensten i Privatmegleren i Valdres.
- I mai er ski-sesongen over og det er lettast å prute, seier Christian Haatuft i Eiendomsmegler1 på Geilo.
Petter Birkrem i Privatmegleren Ullevål legg til at det kan vere ein fordel å sjå hyttetomta utan snø, da får du også inspisert hytta utvendig mykje betre.
Klimaendringane påverkar hyttemarknaden
Yvonne Halvorsen er meklar i det største skianlegget på Vestlandet, Myrkdalen Fjellandsby i Voss kommune. Ho seier at snøsikre område er blitt eit stadig viktigare kriterium.
– Mange ønsker dessutan å sleppe å krysse fjellovergangane for å kome seg til hytta, seier Halvorsen.
Ho får støtte av Ida Follinglo hjå Privatmegleren i Valdres.
– På grunn av klimaendringane opplever vi større etterspurnad etter hytte som ligg høgt over havet, gjerne opp mot 900–1000 meter.
Men det er ikkje berre snø som er viktig. Per Hårstad i Heimdal Eiendomsmegling på Oppdal seier at folk er blitt meir oppteken av at hytta kan nyttast til alle årstider.
Rift om fjellhytter
Etter fleire år med finanskrise og full stopp i hyttesalet, er temperaturen i ferd med å stige i den norske fjellheimen.
Prisane for fritidsbustader på fjellet auka med 5,5 prosent i fjor og salet auka med 13 prosent.
– For fire til fem år sidan var bodrundar utenkeleg på Trysil, seier Petter Birkrem. No er det heilt andre tilstander.
– Leig før du kjøper
Christian Haatuft, som er meklar på Geilo, er ikkje overraska over at nordmenn har fått kjøpelysta tilbake.
– Vi er ein gjeng redebyggarar som sett hyttelivet høgt, og det trur eg er ein av dei største drivarane i marknaden. Men vi opplever eit større fokus på kvalitet og litt mindre på storleik no, meiner Haatuft.
Alle meklarane er samd i at det er viktig å tenke på kor hytta ligg. Ofte kan det vere lurt å leige ei hytte for ein periode, på stadane du vurderar, før ein tek ei avgjersle.