NRK Meny
Normal

Skreiv til kringkastingssjefen for å etterlyse jenter

Åtte år gamle Signe Bakken Berget var lei av at det berre var gutar som fekk synge jula inn i NRK. Difor sende ho brev til kringkastingssjefen og etterlyste jentekor. No har ho fått svar.

Etter å ha sett Sølvguttene synge jula inn i fjor, skreiv Signe Bakken Berget brev til kringkastingssjefen og spurte kvifor det berre er gutar som får synge jula inn.

Tradisjonen tru skal Sølvguttene synge jula inn på NRK julaftan klokka 17. Det har dei gjort kvart år sidan 1966. Men den gong åtte år gamle Signe Bakken Berget såg seg lei på denne tradisjonen. Difor sende ho brev til kringkastingssjef Thor Gjermund Eriksen. Her spurte ho om ikkje Sølvguttene og Det norske jentekor kunne synge jula inn annan kvart år.

– Eg sat i sofaen og såg på Sølvguttene. Då lurte eg på kvifor ikkje jenter også kunne synge jula inn. Så sprang eg ut til skrivepulten for å skrive.

Fekk svar

I dag fekk Signe, som no har blitt ni år, svar då ho fekk besøke kringkastingssjefen på kontoret hans. Og Thor Gjermund Eriksen vedgår at dette var ei problemstilling han ikkje hadde tenkt på.

– Då eg fekk brevet, tenkte eg at dette har eg ikkje tenkt på. Og du har jo heilt rett! Så no blir det jentekor på TV som skal synge «Ja, vi elsker», seier Eriksen.

Signe Bakken Berget og Thor Gjermund Eriksen

Kringkastingssjef Thor Gjermund Eriksen kan love Signe Bakken Berget jentekor på TV i år. Etter nyttårstalen til statsminister Erna Solberg første nyttårsdag framfører Det norske jentekor nasjonalsongen.

Foto: Marianne Rustad Carlsen / NRK

Det er Det norske jentekor som skal framføre nasjonalsongen første nyttårsdag, etter at statsminister Erna Solberg har halde nyttårstalen sin. Ørjan Matre har skrive eit nytt arrangement spesielt for koret.

– Gler oss

Dirigent Anne Karin Sundal-Ask seier til NRK at dei er glade for initiativet, og gler seg veldig til framføringa første nyttårsdag.

– Vi vil takke Signe for eit super initiativ. Dette er eit prosjekt vi gjer med stor stoltheit, og vil gler oss til å synge «Ja, vi elsker» for alle i Noreg.

Det norske jentekor

Det norske jentekor er ei vidareføring av NRKs jentekor, etter at koret gjekk ut av NRK i 1994.

Foto: Det norske jentekor

Signe Bakken Berget er glad for meldinga frå kringkastingssjefen i dag.

– No blei eg veldig glad.

På ein skala frå ein til ti, kor glad då?

Ti.

Kulturstrøm

  • Skryt til «Mission Impossible»

    Den nye «Mission Impossible»-filmen, som delvis er spelt inn i Noreg, får skryt av internasjonal presse. Det skriv VG. Rolling Stone Magazine, Los Angeles Times og Entertainment Weekly er blant dei som rosar filmen. Scena der Tom Cruise heng og dinglar utfor Preikestolen får mykje merksemd. Men Noreg er ikkje nemnt i filmen; fjellplatået er lagt til India.

    MISSION: IMPOSSIBLE - FALLOUT
    Foto: Paramount Pictures
  • Spillerom direkte frå Moldejazz

    Spillerom, NRK P2 sitt musikkprogram, sender live frå Moldejazz denne veka. I dag byr dei på live musikk og fuglekikking med hovudartisten Maria Schneider.

    Vi sender direkte fra Alexandraparken i Molde, der Moldejazz er i full gang. Programleder Tine Skolmen får besøk av aktuelle gjester og festivalmusikere på scenen. Dagens liveband: Ensemble Eliassen.
  • Ny studie om kvinner i film

    Mannlege kritikarar er meir skeptiske til filmar med kvinner i, enn kva kvinnelege kritikarar er, skriv The New York Times. Det viser ein ny studie frå San Diego State University. Studien tar for seg kritikkar publisert på nettstaden Rotten tomatoes. Forskarane finn at kvinnelege kritikarar i gjennomsnitt gir filmar med kvinner i ei vurdering på 74 prosent, medan dei mannlege kritikarane gir 62 prosent i gjennomsnitt til dei same filmane(stjerner og terningkast er gjort om til prosent i studien).