Med dampbåt på Hjørundfjorden

Norge Rundt på NRK1 fredag 25. mai kl. 19:30.

Dampskipet ”Thorolf” var eit vrak då det i 1988 vart tatt hand om av stiftinga ”Thorolfs Venner” i Langevåg. Sidan då er tusenvis av dugnadstimar brukt på å restaurere skipet. Skroget til ”Thorolf” vart bygd i Hardanger i 1910-11, og utrusta ved Brunholmen Mek. Verkstad i Ålesund. I dag er skipet det siste dampskipet i tre som er att i Nord-Europa. Det er kåra til kulturminne for Sula kommune og fekk fylkeskulturprisen i Møre og Romsdal i 2000.

 

 Frå sør til nord

Det var tekstilfirmaet O. A. Devolds Sønner A/S i Langevåg som eigde ”Thorolf,” og som brukte den som agentbåt heilt fram til slutten av sekstiåra. Seljarane budde ombord i skipet i månadsvis i slengen, medan dei farta kysten frå Sørlandet til Finnmark med råvarer, vareprøver og ferdige produkt. Seinare vart skipet seld til Ålesund.

 

”Thorolf” hadde bak seg eit forlis og mange år utan vedlikehald då entusiastane i Langevåg fekk kjøpt skipet tilbake til bygda. I dag er skipet igjen sjødyktig, med den opphavelege dampmaskinen inntakt, og kan leigast til helgeturar.

Fjordslott i sveitserstil  

 

Inst i Nordangsfjorden, ei arm av Hjørundfjorden, ligg den vesle bygda Øye. Og der, ein liten spasertur frå kaia, ligg hotellet i sveitserstil, som i dag er like vakkert og velstelt som då det opna i 1891. Engelske klatrarar og laksefiskarar, medlemmar frå dei europeiske kongehusa og den tyske keiser Wilhelm med følgje var alle hyppige gjester rundt forrige århundreskifte. 

 

Men då ålesundaren Per Ola Ratvik kjøpte hotellet på slutten av 80-talet, var det nesten ein ruin. Det hindra han likevel ikkje i å sjå kva det kunne bli. Med stort engasjement og pågangsmot gjekk han i gang med restaureringsarbeidet. 

 

Tårer og blodslit

Etter mange motbakkar og tøffe tak, kom medhjelparane Johan Øye og Idar Nordang med som kompanjongar. Sidan då har det gått ein veg for hotellet: Oppover. 

 

I dag er det nennsomt restaurert tilbake til slik det kan ha sett ut då det var nytt. Nesten ingen ting var igjen av det gamle interiøret, det som er der i dag er kjøpt på auksjonar, i antikvitetsbutikkar og på loppemarknader i inn- og utland. Sengane er laga etter Ratvik sine teikningar og ingen av romma er like.

 

 

 Ukjent perle

Dei fleste har høyrt om Geirangerfjorden. Hjørundfjorden er ikkje like godt kjent, men vel verd eit besøk den også. Vill, urørt og vakker ligg denna arma av Storfjorden midt i hjartet av Sunnmørsalpane, omkransa av eit mylder av tindar, brear, små grender, fossar og elvar. Det skiftande veret og den storslagne naturen gjer ein tur på Hjørundfjorden til ei stor oppleving.