Bennington hadde seks barn og var gift to gonger. Han skal ha blitt funnen i ein privat bustad i Los Angeles torsdag morgon, ifølgje TMZ.
Metalbandet Linkin Park er kjent for låtar som «Faint», «In the End» og «Crawling». Bandet eksperimenterte med fleire musikksjangrar, og dei samarbeidde mellom anna med Jay-Z. Albumet deira «Meteora» er blant dei mest selde i musikkhistoria.
Har strevd med rus og alkohol
Songaren skal ha strevd med narkotika og alkohol i fleire år. Han har tidlegare sagt at han har blitt misbrukt som barn.
Bennington var ein nær venn av Chris Cornell, som døydde i mai. Han var ein av mange musikarar som spela i minnestunda etter Cornell.
Chester Bennington vart født i Phoenix i Arizona i 1976. Han interesserte seg tidleg for musikk, og har sagt at grupper som Depeche Mode og Stone Temple Pilots var tidlege inspirasjonskjelder.
På turné
Linkin Park er for tida på turné i USA og Canada, og etter planen skulle dei ha neste konsert i Mansfield torsdag 27. juli. I juni var turneen i Europa, og dei besøkte byar som Paris, Berlin og Madrid. Dei var også innom Skandinavia, 29. juni var dei i Norrköping i Sverige.
Linkin Park har vore i Noreg éin gong. I 2011 spelte dei på Hovefestivalen utanfor Arendal.
Rihanna er blant dei som har reagert på sosiale medium. På instagram skriv ho at Chester Bennington er blant dei mest talentfulle ho har sett live.