Direkteoverføring av opera til kinosalar har vore ein suksess både i Noreg og mange andre land, men English National Opera og Sky er dei første som gjennomfører ein 3D-produksjon av ein opera.
English National Opera vann kappløpet
Royal Opera House annonserte i desember at dei overfører Carmen i 3D 5. mars, men ikkje live. Sist helg kom nyheita om at English National Opera lanserer liveoverføring i 3D allereie 23. februar, frå ei framsyning av Gaetano Donizettis opera Lucrezia Borgia.
Det britiske Sky-konsernet har oppretta sin eigen 3D-kanal, Sky 3D, som hadde sine første sendingar sist helg. Denne kanalen kjem til å overføre Lucrezia Borgia, men sendingane er ikkje tilgjengelege utanfor Storbritannia.
Sjå i nett-tv: Innslag i Tekno om hologram og 3D
Sport og film først ut i Noreg
Viasat lanserte i desember Noregs første 3D-kanal, Viasat 3D, og dei første ordinære sendingane vert overført komande helg – frå golfturneringa Sony Open på Hawaii.
– Vi kjem til å prioritere dei områda vi er best på, nemleg sport og film, seier Øystein Hygen Christensen, informasjonsansvarleg i Viasat.
– Det skjer også mykje spennande innan dokumentarsjangeren. Vi utelukkar ikkje musikkproduksjonar heller, men vi har ingen konkrete planar på det området.
Les meir: Spektakulær tur i tre dimensjoner
Verdis «Il Trovatore» er ein av operaene Metropolitan-operaen sender live denne våren, i HD – ikkje 3D.
Foto: Ken Howard/Metropolitan OperaNorske kinoar interessert
Programdirektør i Oslo Kino, Christin Berg, seier at ho gjerne opnar for opera i 3D, men kun dersom Metropolitan-operaen i New York startar med slike overføringar.
– Alle våre overføringar kjem frå Metropolitan, og avtalane vi har inngått med dei inneheld ein klausul om eksklusivitet; vi kan ikkje overføre frå andre operahus, seier Berg.
– Opera på kino er svært populært, så viss Metropolitan-operaen startar med 3D, kjem vi nok til å kaste oss over det, legg ho til.
NRK har ikkje enno lukkast å få på det reine om Metropolitan-operaen har planar om 3D-overføringar.
Først i Stavanger og Sandvika?
Det er imidlertid ikkje berre Metropolitan som sender opera til kino i Noreg. SF Kino, som driv kino mellom anna i Stavanger, Tønsberg og Sandvika, har inngått avtale med distribusjonsselskapet Rising Alternative, som tilbyr overføringar mellom anna frå La Scala i Milano.
– Vi har lagt planane for overføringar ut året, men kan snu oss raskt og bli med på nye satsingar om det skjer noko spennande, seier programsjef Lars Fuglevik i SF Kino Norge.
– Vi ønskjer å henge med på utviklinga, og dette er aktuelt for oss dersom det kjem 3D-overføringar som kvalitetsmessig kan gi publikum noko ekstra.
Aktuelt mot slutten av 2011
Sjefen i Rising Alternative, Giovanni Cozzi, vurderer oppsetjingar for 3D-overføring i løpet av 2011-2012-sesongen.
– Eg kan ikkje kome med konkrete opplysingar, men vi vurderer oppsetjingar for 3D-overføring mot slutten av 2011 og tidleg i 2012, seier Cozzi på telefon frå New York.
